zikr kyun-kar na karun aap ke ruKHsaron ka

zikr kyūñ-kar na karūñ aap ke ruḳhsāroñ kā

huuñ maiñ hāfiz isī qur.ān ke do pāroñ kā

le chalī rahmat-e-haq naaz se jab jānib-e-ḳhuld

dekhā muñh yaas se dozaḳh ne gunahgāroñ kā

ye rah-e-'ishq hai yaañ naaz na kar ai zāhid

kāfiroñ kā vahī rutba hai jo dīñ-dāroñ kā

jald se jald pilā jaam pe jaam ai saaqī

muñh tak aayā hai kaleja tire mai-ḳhvāroñ kā

jiite jī laakh bache laakh subuk-dosh rahe

mar ke ehsān uThānā hī paḌā yāroñ kā

jhuk ke bhar detā hai har ek kā ḳhālī sāġhar

shīsha kartā hai adab daur meñ mai-ḳhvāroñ kā

lutf 'ushshāq ko kūche meñ tire ḳhuld kā hai

sāya-e-tūbā hai saaya tirī dīvāroñ kā

apne muñh dekh liyā karte haiñ bismil qātil

aa.ina ban gayā jauhar tirī dīvāroñ kā

mai-parastī na ga.ī 'rāfat'-e-mehrāb-nashīñ

haa.e is shakl pe ye kaam siyah-kāroñ kā

zikr kyun-kar na karun aap ke ruKHsaron ka

hun main hafiz isi quran ke do paron ka

le chali rahmat-e-haq naz se jab jaanib-e-KHuld

dekha munh yas se dozaKH ne gunahgaron ka

ye rah-e-'ishq hai yan naz na kar ai zahid

kafiron ka wahi rutba hai jo din-daron ka

jald se jald pila jam pe jam ai saqi

munh tak aaya hai kaleja tere mai-KHwaron ka

jite ji lakh bache lakh subuk-dosh rahe

mar ke ehsan uThana hi paDa yaron ka

jhuk ke bhar deta hai har ek ka KHali saghar

shisha karta hai adab daur mein mai-KHwaron ka

lutf 'ushshaq ko kuche mein tere KHuld ka hai

saya-e-tuba hai saya teri diwaron ka

apne munh dekh liya karte hain bismil qatil

aaina ban gaya jauhar teri diwaron ka

mai-parasti na gai 'rafat'-e-mehrab-nashin

hae is shakl pe ye kaam siyah-karon ka