zillaten sahte rahe nilam ghairat ki gai

zillateñ sahte rahe nīlām ġhairat kī ga.ī

tab kahīñ jā kar miyāñ hāsil ye shohrat kī ga.ī

jaane kaisā shahr hai jal uThte haiñ jab bhī charāġh

bhej kar āñdhī añdheroñ kī hifāzat kī ga.ī

kuchh pata chal hī na paayā vaar kab kaise huā

dostī kī aaḌ meñ ham se 'adāvat kī ga.ī

ho chukā thā chand hī lamhoñ meñ vo qissa tamām

aur is qisse kī sadiyoñ tak vazāhat kī ga.ī

ai mire dil un kā andāz-e-mohabbat dekh kar

lag rahā hai mujh ko yuuñ goyā sharārat kī ga.ī

maiñ bhalā bach paatā kaise zulm ke pathrāv se

kāñch kī dīvār se merī hifāzat kī ga.ī

nekiyāñ karne kā 'ātif' kyā 'ajab andāz hai

saikḌoñ ko luuT kar kuchh par saḳhāvat kī ga.ī

zillaten sahte rahe nilam ghairat ki gai

tab kahin ja kar miyan hasil ye shohrat ki gai

jaane kaisa shahr hai jal uThte hain jab bhi charagh

bhej kar aandhi andheron ki hifazat ki gai

kuchh pata chal hi na paya war kab kaise hua

dosti ki aaD mein hum se 'adawat ki gai

ho chuka tha chand hi lamhon mein wo qissa tamam

aur is qisse ki sadiyon tak wazahat ki gai

ai mere dil un ka andaz-e-mohabbat dekh kar

lag raha hai mujh ko yun goya shararat ki gai

main bhala bach pata kaise zulm ke pathraw se

kanch ki diwar se meri hifazat ki gai

nekiyan karne ka 'atif' kya 'ajab andaz hai

saikDon ko luT kar kuchh par saKHawat ki gai