zindagani hai meri teri nazar hone tak

zindagānī hai mirī terī nazar hone tak

raushnī sham.a kī hai nūr-e-sahar hone tak

umr-e-do-roza par aur maal pe bejā hai ġhurūr

der lagtī hai kahāñ ḳhaak bashar hone tak

aa hī jaa.eñ na kahīñ bād-e-ḳhizāñ ke jhoñke

vaqt darkār hai phūloñ ko samar hone tak

saañs kī āmad-o-shud hai na davāmī hargiz

is kī raftār bhī hai dard-e-jigar hone tak

zarre zarre meñ badal jā.eñge ye shams-o-qamar

zarre zarre bhī to haiñ shams-o-qamar hone tak

dosh aur pusht kī zīnat hai jo zulf-e-pechāñ

hai pareshān bahut zeb-e-kamar hone tak

aag hai dil meñ lagī siina banā hai bhaTTī

raakh ho jā.ūñgā maiñ dīda-e-tar hone tak

shakl-e-insāñ meñ har insān kahāñ hai insāñ

ādamiyyat kā sharaf to hai bashar hone tak

nā-tavānoñ ko bhī kamzor na jaano hargiz

paanī paanī hai faqat barq-o-sharar hone tak

ek fa'āl harārat kī zarūrat bhī to hai

ḳhāk-e-namnāk ko ḳhisht aur hajar hone tak

maut kahte haiñ jise hai vo hayāt-e-abadī

maut hai lāzim-o-malzūm amar hone tak

jaan bhī jaan hai jab tak hai badan ke andar

jism hai jism-e-hasīñ nau-e-dīgar hone tak

haath ab khīñch hī lo āh-o-fuġhāñ se 'arshad'

kyā na mar jāoge tum in meñ asar hone tuk

zindagani hai meri teri nazar hone tak

raushni shama ki hai nur-e-sahar hone tak

umr-e-do-roza par aur mal pe beja hai ghurur

der lagti hai kahan KHak bashar hone tak

aa hi jaen na kahin baad-e-KHizan ke jhonke

waqt darkar hai phulon ko samar hone tak

sans ki aamad-o-shud hai na dawami hargiz

is ki raftar bhi hai dard-e-jigar hone tak

zarre zarre mein badal jaenge ye shams-o-qamar

zarre zarre bhi to hain shams-o-qamar hone tak

dosh aur pusht ki zinat hai jo zulf-e-pechan

hai pareshan bahut zeb-e-kamar hone tak

aag hai dil mein lagi sina bana hai bhaTTi

rakh ho jaunga main dida-e-tar hone tak

shakl-e-insan mein har insan kahan hai insan

aadamiyyat ka sharaf to hai bashar hone tak

na-tawanon ko bhi kamzor na jaano hargiz

pani pani hai faqat barq-o-sharar hone tak

ek fa'al hararat ki zarurat bhi to hai

KHak-e-namnak ko KHisht aur hajar hone tak

maut kahte hain jise hai wo hayat-e-abadi

maut hai lazim-o-malzum amar hone tak

jaan bhi jaan hai jab tak hai badan ke andar

jism hai jism-e-hasin nau-e-digar hone tak

hath ab khinch hi lo aah-o-fughan se 'arshad'

kya na mar jaoge tum in mein asar hone tuk