zindagani se lipaT kar KHud ko bahlata hun main

zindagānī se lipaT kar ḳhud ko bahlātā huuñ maiñ

ye kahānī roz apne aap dohrātā huuñ maiñ

sub.h-dam maiñ kholtā huuñ qufl jis zindān kā

din Dhale us qaid-ḳhāne meñ palaT aatā huuñ maiñ

pāTtā rahtā huuñ din bhar ik ḳhalīj-e-zāt ko

phir kisī anjān andeshe se pachhtātā huuñ maiñ

din chaḌhe auhām kī manDī meñ saudā bech kar

raat ko afkār ke bistar pe gir jaatā huuñ maiñ

oḌh letā huuñ maiñ chādar aql-o-istidlāl kī

dāstānoñ loriyoñ se ḳhud ko bahlātā huuñ maiñ

ḳhvāb meñ aksar kināre chashma-e-imkān ke

mastī-e-harf-o-suḳhan kī lai meñ chakrātā huuñ maiñ

chhoḌtā huuñ haath apnā shāhrāh-e-shauq par

manzil-e-maqsūd par phir ḳhud ko mil jaatā huuñ maiñ

jab bhī miltā huuñ ḳhud apne aap se tanhā.ī meñ

pūchhtā huuñ kyā gañvāyā aur kyā paatā huuñ maiñ

ḳhud hī kartā huuñ tirī yādeñ maiñ maazī ke sipurd

phir kahīñ se ek lamha DhūñD kar laatā huuñ maiñ

tujh meñ aksar DhūñDhtā huuñ maiñ tujhe 'āsim' magar

tū kahāñ hai kaun hai kab kis ko samjhātā huuñ maiñ

zindagani se lipaT kar KHud ko bahlata hun main

ye kahani roz apne aap dohraata hun main

subh-dam main kholta hun qufl jis zindan ka

din Dhale us qaid-KHane mein palaT aata hun main

paTta rahta hun din bhar ek KHalij-e-zat ko

phir kisi anjaan andeshe se pachhtata hun main

din chaDhe auham ki manDi mein sauda bech kar

raat ko afkar ke bistar pe gir jata hun main

oDh leta hun main chadar aql-o-istidlal ki

dastanon loriyon se KHud ko bahlata hun main

KHwab mein aksar kinare chashma-e-imkan ke

masti-e-harf-o-suKHan ki lai mein chakraata hun main

chhoDta hun hath apna shahrah-e-shauq par

manzil-e-maqsud par phir KHud ko mil jata hun main

jab bhi milta hun KHud apne aap se tanhai mein

puchhta hun kya ganwaya aur kya pata hun main

KHud hi karta hun teri yaaden main mazi ke sipurd

phir kahin se ek lamha DhunD kar lata hun main

tujh mein aksar DhunDhta hun main tujhe 'asim' magar

tu kahan hai kaun hai kab kis ko samjhata hun main