zindagi ab rahe KHata kab tak

zindagī ab rahe ḳhatā kab tak

jurm kī bārhā sazā kab tak

nāḳhudā huuñ maiñ apnī kashtī kā

ye ḳhudāoñ kā silsila kab tak

apnī pathrā ga.ī haiñ āñkheñ bhī

husn parda uThā.egā kab tak

kaun pakḌegā bhāgte saa.e

kaun dekhegā rāsta kab tak

ġhāliban aur shāhrāheñ haiñ

ek hī band rāsta kab tak

aadmī aadmī kā dushman hai

jaane ho mehrbāñ ḳhudā kab tak

be-sabab phir rahe haiñ muddat se

kījiye vaqt kā gilā kab tak

kaam apnā 'harī' parastish hai

be-asar phir rahe duā kab tak

zindagi ab rahe KHata kab tak

jurm ki barha saza kab tak

naKHuda hun main apni kashti ka

ye KHudaon ka silsila kab tak

apni pathra gai hain aankhen bhi

husn parda uThaega kab tak

kaun pakDega bhagte sae

kaun dekhega rasta kab tak

ghaaliban aur shahrahen hain

ek hi band rasta kab tak

aadmi aadmi ka dushman hai

jaane ho mehrban KHuda kab tak

be-sabab phir rahe hain muddat se

kijiye waqt ka gila kab tak

kaam apna 'hari' parastish hai

be-asar phir rahe dua kab tak