zindagi apni hui yar ki fitrat ki tarah

zindagī apnī huī yaar kī fitrat kī tarah

ham bhī kal hoñ ki na hoñ us kī ināyat kī tarah

vaqt ham ko ye bure din na dikhātā ai kaash

ham bhī uTh jaate zamāne se mohabbat kī tarah

ham to har lamhe ko dete rahe sāñsoñ kā hisāb

ham pe TuuTā hai har ik lamha qayāmat kī tarah

gul khilā.egā ye maqtūl-lahū dhartī par

kisī ruḳhsār pe chaḌhtī huī rañgat kī tarah

log kahte haiñ na kyoñ bhuul gayā maiñ us ko

vo ki thā jo mirī buniyādī zarūrat kī tarah

zindagī to kisī sāġhar meñ Dhalī to hotī

ham to pī lete tujhe jām-e-shahādat kī tarah

zindagi apni hui yar ki fitrat ki tarah

hum bhi kal hon ki na hon us ki inayat ki tarah

waqt hum ko ye bure din na dikhata ai kash

hum bhi uTh jate zamane se mohabbat ki tarah

hum to har lamhe ko dete rahe sanson ka hisab

hum pe TuTa hai har ek lamha qayamat ki tarah

gul khilaega ye maqtul-lahu dharti par

kisi ruKHsar pe chaDhti hui rangat ki tarah

log kahte hain na kyon bhul gaya main us ko

wo ki tha jo meri buniyaadi zarurat ki tarah

zindagi to kisi saghar mein Dhali to hoti

hum to pi lete tujhe jam-e-shahadat ki tarah