zindagi be-kaif dil be-muddaa ho jaega

zindagī be-kaif dil be-mudda'ā ho jā.egā

bin tire ai dost jiinā ik sazā ho jā.egā

ye to sunte the jahāñ meñ kaun kis kā hai magar

ye kahāñ sochā thā tū bhī bevafā ho jā.egā

aaj sab darvāze mujh par band haiñ to kyā huā

vo agar chāhegā har darvāza vā ho jā.egā

laakh achchhā ho to kyā us aadmī ko ek din

sab burā kahne lageñ to vo burā ho jā.egā

vaqt kī gardish se andāza ye hotā hai mujhe

misl-e-māzī haal kā ġham bhī fanā ho jā.egā

dair meñ kiije ki kā'be meñ jabīñ ḳham kījiye

dil jahāñ jhuk jā.egā sajda adā ho jā.egā

kitne hī janmoñ se 'gulshan' merā us kā saath hai

is janam meñ bhī milegā vo judā ho jā.egā

zindagi be-kaif dil be-mudda'a ho jaega

bin tere ai dost jina ek saza ho jaega

ye to sunte the jahan mein kaun kis ka hai magar

ye kahan socha tha tu bhi bewafa ho jaega

aaj sab darwaze mujh par band hain to kya hua

wo agar chahega har darwaza wa ho jaega

lakh achchha ho to kya us aadmi ko ek din

sab bura kahne lagen to wo bura ho jaega

waqt ki gardish se andaza ye hota hai mujhe

misl-e-mazi haal ka gham bhi fana ho jaega

dair mein kije ki ka'be mein jabin KHam kijiye

dil jahan jhuk jaega sajda ada ho jaega

kitne hi janmon se 'gulshan' mera us ka sath hai

is janam mein bhi milega wo juda ho jaega