zindagi-bhar ke liye tujhse KHafa ho jaunga

zindagī-bhar ke liye tujh se ḳhafā ho jā.uñgā

jo na hogā ḳhatm maiñ vo fāsla ho jā.uñgā

jab kabhī qaid-e-musībat se rihā ho jā.uñgā

dostoñ ke vāste phir āshnā ho jā.uñgā

soch le zālim sitam ke baa'd māyūsī na ho

merā kyā hai paikar-e-sabr-o-razā ho jā.uñgā

vo burā kahtā hai mujh ko shauq se kahtā rahe

kyā burā kahne se us ke maiñ burā ho jā.uñgā

phail jā.uñgā fazā meñ har taraf phailā jo maiñ

aur agar simTā to terā naqsh-e-pā ho jā.uñgā

DhūñDhnā ḳhud ko paḌegā justujū-e-yār meñ

kyā ḳhabar thī is qadar maiñ lāpata ho jā.uñgā

maiñ abhī dast-e-sikandar meñ huuñ patthar huuñ to kyā

qaid sūraj ko karūñgā aa.ina ho jā.uñgā

maiñ dayār-e-shauq meñ ik khoTā sikka huuñ to kyā

aap ke hāthoñ meñ pohñchā to kharā ho jā.uñgā

din to jaise-taise kaT jā.egā lekin ai 'shafīq'

shaam hote hī ġhamoñ meñ mubtalā ho jā.uñgā

zindagi-bhar ke liye tujh se KHafa ho jaunga

jo na hoga KHatm main wo fasla ho jaunga

jab kabhi qaid-e-musibat se riha ho jaunga

doston ke waste phir aashna ho jaunga

soch le zalim sitam ke ba'd mayusi na ho

mera kya hai paikar-e-sabr-o-raza ho jaunga

wo bura kahta hai mujh ko shauq se kahta rahe

kya bura kahne se us ke main bura ho jaunga

phail jaunga faza mein har taraf phaila jo main

aur agar simTa to tera naqsh-e-pa ho jaunga

DhunDhna KHud ko paDega justuju-e-yar mein

kya KHabar thi is qadar main lapata ho jaunga

main abhi dast-e-sikandar mein hun patthar hun to kya

qaid suraj ko karunga aaina ho jaunga

main dayar-e-shauq mein ek khoTa sikka hun to kya

aap ke hathon mein pohncha to khara ho jaunga

din to jaise-taise kaT jaega lekin ai 'shafiq'

sham hote hi ghamon mein mubtala ho jaunga