zindagi gham ke andheron mein sanwarne se rahi

zindagī ġham ke añdheroñ meñ sañvarne se rahī

ek tanvīr-e-hayāt aaj ubharne se rahī

maiñ payambar nahīñ insāñ huuñ ḳhatā-kār insāñ

arsh se koī vahī mujh par utarne se rahī

maiñ ne kar rakkhā hai mahsūr chaman kī had tak

shāḳh-dar-shāḳh koī barq guzarne se rahī

laakh afkār-o-havādis mujhe rauñdeñ baḌh kar

jo vafā mujh ko milī hai kabhī marne se rahī

aadmī kitne hayūle hī banā kar rakkhe

maut phir maut hai jab aa.ī to Darne se rahī

āḳhirī vaqt hai muḳhtal hue jaate haiñ havās

aise meñ merī ḳhudī kaam to karne se rahī

gher rakkhā hai har ik samt se tūfānoñ ne

merī kashtī to kabhī paar utarne se rahī

'sādiq' us moḌ pe le aate haiñ hālāt hameñ

mauj-e-ehsās zarā aaj Thaharne se rahī

zindagi gham ke andheron mein sanwarne se rahi

ek tanwir-e-hayat aaj ubharne se rahi

main payambar nahin insan hun KHata-kar insan

arsh se koi wahi mujh par utarne se rahi

main ne kar rakkha hai mahsur chaman ki had tak

shaKH-dar-shaKH koi barq guzarne se rahi

lakh afkar-o-hawadis mujhe raunden baDh kar

jo wafa mujh ko mili hai kabhi marne se rahi

aadmi kitne hayule hi bana kar rakkhe

maut phir maut hai jab aai to Darne se rahi

aaKHiri waqt hai muKHtal hue jate hain hawas

aise mein meri KHudi kaam to karne se rahi

gher rakkha hai har ek samt se tufanon ne

meri kashti to kabhi par utarne se rahi

'sadiq' us moD pe le aate hain haalat hamein

mauj-e-ehsas zara aaj Thaharne se rahi