zindagi guzri hai aksar aise unwanon ke bich

zindagī guzrī hai aksar aise unvānoñ ke biich

jaise sachchā.ī bayāñ kī jaa.e afsānoñ ke biich

chāk-e-dāman sī rahe haiñ aaj dīvānoñ ke biich

shā'irī jaise kiyā karte haiñ nā-dānoñ ke biich

husn ko pahchānte hī ḳhvāb tak jaate rahe

ye bhī ik nuqsāñ huā hai saare nuqsānoñ ke biich

shaam Dhalte dard terā is tarah raushan huā

jaise aañsū jhilmilā jaate haiñ muskānoñ ke biich

DevḌhī ko nazm karne ke liye sochā bahut

kitnī yādeñ le ke baiThā huuñ maiñ dālānoñ ko biich

qadr kar lo ai na.ī nasloñ ke fankāro ki ham

DhūñDne par bhī na mil pā.eñge imkānoñ ke biich

mutma.in to koī bhī 'shāhid' nahīñ hai dahr meñ

aarzū jiine kī phir bhī hai pareshānoñ ke biich

zindagi guzri hai aksar aise unwanon ke bich

jaise sachchai bayan ki jae afsanon ke bich

chaak-e-daman si rahe hain aaj diwanon ke bich

sha'iri jaise kiya karte hain na-danon ke bich

husn ko pahchante hi KHwab tak jate rahe

ye bhi ek nuqsan hua hai sare nuqsanon ke bich

sham Dhalte dard tera is tarah raushan hua

jaise aansu jhilmila jate hain muskanon ke bich

DewDhi ko nazm karne ke liye socha bahut

kitni yaaden le ke baiTha hun main dalanon ko bich

qadr kar lo ai nai naslon ke fankaro ki hum

DhunDne par bhi na mil paenge imkanon ke bich

mutmain to koi bhi 'shahid' nahin hai dahr mein

aarzu jine ki phir bhi hai pareshanon ke bich