zindagi hai mere hathon mein taraazu ki tarah

zindagī hai mere hāthoñ meñ tarāzū kī tarah

vaqt Thahrā hai merī āñkhoñ meñ aañsū kī tarah

aa.ine meñ mire chehre kā tirā ho jaanā

muñh chiḌhātā hai mujhe raat ke jaadū kī tarah

maiñ jahāñ jā.ūñ mahaktā hai tasavvur terā

saath rahtā hai vo ehsās kī ḳhushbū kī tarah

tere jaane pe ye ehsās huā hai aksar

ḳhālī ḳhālī sī hai duniyā mire pahlū kī tarah

jaltī rakh aayā huuñ āñkheñ maiñ kahīñ chaukhaT par

terī rāhoñ meñ hai raushan kisī jugnū kī tarah

vasl ke baa'd bhī suntā huuñ hañsī ko terī

der tak kaan meñ bajtī hai vo ghuñghrū kī tarah

zindagi hai mere hathon mein taraazu ki tarah

waqt Thahra hai meri aankhon mein aansu ki tarah

aaine mein mere chehre ka tera ho jaana

munh chiDhata hai mujhe raat ke jadu ki tarah

main jahan jaun mahakta hai tasawwur tera

sath rahta hai wo ehsas ki KHushbu ki tarah

tere jaane pe ye ehsas hua hai aksar

KHali KHali si hai duniya mere pahlu ki tarah

jalti rakh aaya hun aankhen main kahin chaukhaT par

teri rahon mein hai raushan kisi jugnu ki tarah

wasl ke ba'd bhi sunta hun hansi ko teri

der tak kan mein bajti hai wo ghunghru ki tarah