zindagi hum tere ehsan se kab niklenge

zindagī ham tire ehsān se kab nikleñge

phuul sūkhe hue gul-dān se kab nikleñge

dar-o-dīvār mirī ruuh ko kab chhoḌeñge

mere saa.e mire dālān se kab nikleñge

yaum-e-āḳhīr mirī aañkh meñ kab aa.egā

tere ausāf kal insān se kab nikleñge

shā.erī ne mire logoñ ko judā mujh se kiyā

ye jarāsīm mirī jaan se kab nikleñge

sāhilī log tahaffuz kī duā māñgte haiñ

ye safīne tire tūfān se kab nikleñge

ajnabī haath mire rāh-numā kab hoñge

rāste manzil-e-anjān se kab nikleñge

jaane ham shar ke havālāt se kab chhūTeñge

rāste ḳhair ke juzdān se kab nikleñge

zindagi hum tere ehsan se kab niklenge

phul sukhe hue gul-dan se kab niklenge

dar-o-diwar meri ruh ko kab chhoDenge

mere sae mere dalan se kab niklenge

yaum-e-aKHir meri aankh mein kab aaega

tere ausaf kal insan se kab niklenge

shaeri ne mere logon ko juda mujh se kiya

ye jarasim meri jaan se kab niklenge

sahili log tahaffuz ki dua mangte hain

ye safine tere tufan se kab niklenge

ajnabi hath mere rah-numa kab honge

raste manzil-e-anjaan se kab niklenge

jaane hum shar ke hawalat se kab chhuTenge

raste KHair ke juzdan se kab niklenge