zindagi ho gai hai lahu kya karen

zindagī ho ga.ī hai lahū kyā kareñ

ai ġham-e-dil tirī aarzū kyā kareñ

kūcha-e-zīst meñ hāo-hū kyā kareñ

zer-e-ḳhanjar hai apnā gulū kyā kareñ

dāman-e-hosh apnā rafū kyā kareñ

har jagah bah rahā hai lahū kyā kareñ

dil ko bhātā nahīñ nafratoñ kā samāñ

pyaar badnām hai kū-ba-kū kyā kareñ

shiddat-e-dard se aañkh bhar aa.ī hai

mil ga.ī ḳhaak meñ aabrū kyā kareñ

zaḳhm hī zaḳhm haiñ daaġh hī daaġh haiñ

aa.ina chehre ke rū-barū kyā kareñ

dil kā ab dil se rishta hī baaqī nahīñ

dost bhī lag rahā hai 'adū kyā kareñ

ik 'ajab aag meñ jal rahe haiñ sabhī

hai dhuāñ hī dhuāñ chār-sū kyā kareñ

jis ko jalnā thā 'parkāsh' vo jal gayā

raakh par baiTh kar justujū kyā kareñ

zindagi ho gai hai lahu kya karen

ai gham-e-dil teri aarzu kya karen

kucha-e-zist mein hao-hu kya karen

zer-e-KHanjar hai apna gulu kya karen

daman-e-hosh apna rafu kya karen

har jagah bah raha hai lahu kya karen

dil ko bhata nahin nafraton ka saman

pyar badnam hai ku-ba-ku kya karen

shiddat-e-dard se aankh bhar aai hai

mil gai KHak mein aabru kya karen

zaKHm hi zaKHm hain dagh hi dagh hain

aaina chehre ke ru-baru kya karen

dil ka ab dil se rishta hi baqi nahin

dost bhi lag raha hai 'adu kya karen

ek 'ajab aag mein jal rahe hain sabhi

hai dhuan hi dhuan chaar-su kya karen

jis ko jalna tha 'parkash' wo jal gaya

rakh par baiTh kar justuju kya karen