zindagi ho gai kis tarah basar yaad nahin

zindagī ho ga.ī kis tarah basar yaad nahīñ

roz-o-shab yaad nahīñ shām-o-sahar yaad nahīñ

luT gayā kaise mohabbat meñ ye ghar yaad nahīñ

kaise barbād hue qalb-o-jigar yaad nahīñ

hāl-e-zār apne dil-afgār kā kyoñ bhuul ga.e

ḳhushk lab yaad nahīñ dīda-e-tar yaad nahīñ

zāhid-e-ḳhushk hue dete haiñ sab ko ta.alīm

shaiḳh ko apnā kabhī dāman-e-tar yaad nahīñ

un kī tanqīd-nigāhī pe hai dil ko hairat

aib sab ginte haiñ aur ek hunar yaad nahīñ

aaj pahlū meñ pata dil kā nahīñ miltā hai

kaam kab kar ga.ī duzdīda nazar yaad nahīñ

TikTikī chashm-e-tamannā ko dam-e-jalva rahī

kis ghaḌī TuuT gayā tār-e-nazar yaad nahīñ

mujh se va.ada jo liyā tum ne jo iqrār kiyā

mujh ko to yaad hai sab tum ko magar yaad nahīñ

mil ke 'sāqib' mujhe aarā ke suḳhan-sanjoñ se

huī hāsil vo ḳhushī ranj-e-safar yaad nahīñ

zindagi ho gai kis tarah basar yaad nahin

roz-o-shab yaad nahin sham-o-sahar yaad nahin

luT gaya kaise mohabbat mein ye ghar yaad nahin

kaise barbaad hue qalb-o-jigar yaad nahin

haal-e-zar apne dil-afgar ka kyon bhul gae

KHushk lab yaad nahin dida-e-tar yaad nahin

zahid-e-KHushk hue dete hain sab ko talim

shaiKH ko apna kabhi daman-e-tar yaad nahin

un ki tanqid-nigahi pe hai dil ko hairat

aib sab ginte hain aur ek hunar yaad nahin

aaj pahlu mein pata dil ka nahin milta hai

kaam kab kar gai duzdida nazar yaad nahin

TikTiki chashm-e-tamanna ko dam-e-jalwa rahi

kis ghaDi TuT gaya tar-e-nazar yaad nahin

mujh se wada jo liya tum ne jo iqrar kiya

mujh ko to yaad hai sab tum ko magar yaad nahin

mil ke 'saqib' mujhe aara ke suKHan-sanjon se

hui hasil wo KHushi ranj-e-safar yaad nahin