zindagi jine ka wo sab ko hunar deta hai

zindagī jiine kā vo sab ko hunar detā hai

ġham jise detā hai patthar kā jigar detā hai

muflisoñ ko vo banā detā hai fayyāz kabhī

kabhī kam-zarfoñ ko vo lā'l-o-guhar detā hai

māñgnā merā 'amal denā 'ināyat us kī

ik vahī hai jo du'āoñ meñ asar detā hai

roz paḌhte haiñ jise kahte haiñ aḳhbār use

be-ḳhabar ho ke zamāne kī ḳhabar detā hai

jis kā dil 'ishq kī mastī se bharā ho yaaro

'ishq kī raah meñ vo dil nahīñ sar detā hai

aag nafrat ne lagā rakkhī hai dil meñ aisī

ab kirā.e pe koī soch ke ghar detā hai

rāh-e-haq meñ jo har ik chiiz luTātā hai 'kashish'

us kī jholī ko ḳhudā ġhaib se bhar detā hai

zindagi jine ka wo sab ko hunar deta hai

gham jise deta hai patthar ka jigar deta hai

muflison ko wo bana deta hai fayyaz kabhi

kabhi kam-zarfon ko wo la'l-o-guhar deta hai

mangna mera 'amal dena 'inayat us ki

ek wahi hai jo du'aon mein asar deta hai

roz paDhte hain jise kahte hain aKHbar use

be-KHabar ho ke zamane ki KHabar deta hai

jis ka dil 'ishq ki masti se bhara ho yaro

'ishq ki rah mein wo dil nahin sar deta hai

aag nafrat ne laga rakkhi hai dil mein aisi

ab kirae pe koi soch ke ghar deta hai

rah-e-haq mein jo har ek chiz luTata hai 'kashish'

us ki jholi ko KHuda ghaib se bhar deta hai