zindagi jine ka ye taur naya rakkha hai

zindagī jiine kā ye taur nayā rakkhā hai

dard kā naam bhī ab ham ne davā rakkhā hai

hasrateñ rahne kā imkāñ hī nahīñ hai dil meñ

ārzūoñ kā nishāñ ham ne miTā rakkhā hai

soz-o-ġham haiñ yā ki armāñ hai koī kyā mā'lūm

dil ke hālāt ko siine ne chhupā rakhā hai

Dūbne vaale ne tinke kā sahārā na liyā

par tire naam ko siine se lagā rakkhā hai

gar jo fitrat meñ vafā rakkhī hai to lāzim hai

is jahāñ meñ hī kahīñ ajr-e-vafā rakkhā hai

maiñ ne jis dil ko tire qadmoñ tale rakkhā thā

tū ne us dil ko dukhānā hī ravā rakkhā hai

ġham-e-furqat meñ taḌaptī hai har ik shai 'sāqib'

shor sā dil ne bhī siine meñ machā rakhā hai

zindagi jine ka ye taur naya rakkha hai

dard ka nam bhi ab hum ne dawa rakkha hai

hasraten rahne ka imkan hi nahin hai dil mein

aarzuon ka nishan hum ne miTa rakkha hai

soz-o-gham hain ya ki arman hai koi kya ma'lum

dil ke haalat ko sine ne chhupa rakha hai

Dubne wale ne tinke ka sahaara na liya

par tere nam ko sine se laga rakkha hai

gar jo fitrat mein wafa rakkhi hai to lazim hai

is jahan mein hi kahin ajr-e-wafa rakkha hai

main ne jis dil ko tere qadmon tale rakkha tha

tu ne us dil ko dukhana hi rawa rakkha hai

gham-e-furqat mein taDapti hai har ek shai 'saqib'

shor sa dil ne bhi sine mein macha rakha hai