zindagi ka Dhang ye kaisa hai tere shahr mein

zindagī kā Dhang ye kaisā hai tere shahr meñ

ek rotā hai to ik hañstā hai tere shahr meñ

haath meñ patthar liye ik bhiiḌ hai har moḌ par

in dinoñ merā bahut charchā hai tere shahr meñ

mere siine meñ sulagtā hai koī ātish-fishāñ

har qadam par dil mirā jaltā hai tere shahr meñ

jin ke āñkheñ haiñ unheñ kuchh bhī nazar aatā nahīñ

dekhne vaalā magar andhā hai tere shahr meñ

jab koī chaḌhtā hai uupar khīñch lete haiñ use

ek girtā hai to ik uThtā hai tere shahr meñ

log sīñcheñge lahū se lahlahātī fasl ko

nafratoñ ke biij vo botā hai tere shahr meñ

jal rahī hai dhīre dhīre dil ke rishtoñ kī miThās

kaun hai jo aag bhaḌkātā hai tere shahr meñ

āstīnoñ meñ haiñ ḳhanjar phir bhī milte haiñ gale

dostī ke naam par dhoka hai tere shahr meñ

kis kī chīḳhoñ se larazte haiñ dar-o-dīvār sab

kaun hai jo raat bhar rotā hai tere shahr meñ

paañv se ma.azūr ho jaatā hai ḳhālis aur kharā

haañ vahī chaltā hai jo khoTā hai tere shahr meñ

tanz kartā hai mirī ġhurbat pe merā hī zamīr

hai burā vo shaḳhs jo achchhā hai tere shahr meñ

jañgaloñ meñ bheḌiye ko bheḌiyā khātā nahīñ

aadmī ko aadmī khātā hai tere shahr meñ

roz marne kī duā.eñ māñgtī hai zindagī

bas vahī zinda hai jo murda hai tere shahr meñ

kar diyā ta.amīr us kī qabr par bait-ul-ḳhalā

ek shā.ir kis qadar rusvā hai tere shahr meñ

āñdhiyoñ meñ bujh ga.e haiñ shahr ke saare charāġh

ek raushan bas tirā chehra hai tere shahr meñ

zindagi ka Dhang ye kaisa hai tere shahr mein

ek rota hai to ek hansta hai tere shahr mein

hath mein patthar liye ek bhiD hai har moD par

in dinon mera bahut charcha hai tere shahr mein

mere sine mein sulagta hai koi aatish-fishan

har qadam par dil mera jalta hai tere shahr mein

jin ke aankhen hain unhen kuchh bhi nazar aata nahin

dekhne wala magar andha hai tere shahr mein

jab koi chaDhta hai upar khinch lete hain use

ek girta hai to ek uThta hai tere shahr mein

log sinchenge lahu se lahlahati fasl ko

nafraton ke bij wo bota hai tere shahr mein

jal rahi hai dhire dhire dil ke rishton ki miThas

kaun hai jo aag bhaDkata hai tere shahr mein

aastinon mein hain KHanjar phir bhi milte hain gale

dosti ke nam par dhoka hai tere shahr mein

kis ki chiKHon se larazte hain dar-o-diwar sab

kaun hai jo raat bhar rota hai tere shahr mein

panw se mazur ho jata hai KHalis aur khara

han wahi chalta hai jo khoTa hai tere shahr mein

tanz karta hai meri ghurbat pe mera hi zamir

hai bura wo shaKHs jo achchha hai tere shahr mein

jangalon mein bheDiye ko bheDiya khata nahin

aadmi ko aadmi khata hai tere shahr mein

roz marne ki duaen mangti hai zindagi

bas wahi zinda hai jo murda hai tere shahr mein

kar diya tamir us ki qabr par bait-ul-KHala

ek shair kis qadar ruswa hai tere shahr mein

aandhiyon mein bujh gae hain shahr ke sare charagh

ek raushan bas tera chehra hai tere shahr mein