zindagi ka koi sahaara ho

zindagī kā koī sahārā ho

ham kisī ke koī hamārā ho

terī āvāz sun ke lagtā hai

jaise tanhā.ī ne pukārā ho

baat jab bhī ho chāñd tāroñ kī

terī āñkhoñ kā isti.ārā ho

raat jab aañkh meñ utar aa.ī

kis tarah sub.h kā nazārā ho

dil kahīñ aur lag hī jā.egā

ik isī ġham pe kyā guzārā ho

ġhaib kā ilm to nahīñ mujh ko

na hoñ alfāz to ishāra ho

de diyā hai to ye bhī batlā do

kis tarah dard ye gavāra ho

der se muntazir musāfir hai

ab daraḳhshāñ koī sitārā ho

maiñ to dariyā-e-pur-talātum huuñ

tum to mahfūz ik kinārā ho

sang-dil kuchh to de gumāñ ko mire

na ho sho.ala to ik sharāra ho

zindagi ka koi sahaara ho

hum kisi ke koi hamara ho

teri aawaz sun ke lagta hai

jaise tanhai ne pukara ho

baat jab bhi ho chand taron ki

teri aankhon ka istiara ho

raat jab aankh mein utar aai

kis tarah subh ka nazara ho

dil kahin aur lag hi jaega

ek isi gham pe kya guzara ho

ghaib ka ilm to nahin mujh ko

na hon alfaz to ishaara ho

de diya hai to ye bhi batla do

kis tarah dard ye gawara ho

der se muntazir musafir hai

ab daraKHshan koi sitara ho

main to dariya-e-pur-talatum hun

tum to mahfuz ek kinara ho

sang-dil kuchh to de guman ko mere

na ho shoala to ek sharara ho