zindagi karte hain is haal mein mar jate hain

zindagī karte haiñ is haal meñ mar jaate haiñ

ham to har baar usī rah se guzar jaate haiñ

yuuñ shab-o-roz ke chakkar meñ sameTeñ kyā kyā

kuchh to an-dekhe bhī lamhāt bikhar jaate haiñ

ho na ehsās-e-junūñ ke hī muāfiq ye fazā

yuuñ to saa.e meñ ḳhayālāt sañvar jaate haiñ

aaj is bahr-e-tafakkur kā tamavvuj dekheñ

aaj ik aur hī sahrā meñ utar jaate haiñ

Duub marnā hī jo ho to bhī safīna chāhe

le ke jaatā hai kināre ko bhañvar jaate haiñ

apnī illat ki ham iifā kiye jaate haiñ vo ahd

un kī azmat ki vo har aan mukar jaate haiñ

aur baḌh jaa.eñ agar nāḳhun-e-ehsās-e-firāq

zaḳhm gahre hoñ to hoñ aur nikhar jaate haiñ

ham se Takrāne ke haiñ taur yahīñ se ho kar

hameñ ma.alūm hai 'nāzir' vo kidhar jaate haiñ

zindagi karte hain is haal mein mar jate hain

hum to har bar usi rah se guzar jate hain

yun shab-o-roz ke chakkar mein sameTen kya kya

kuchh to an-dekhe bhi lamhat bikhar jate hain

ho na ehsas-e-junun ke hi muafiq ye faza

yun to sae mein KHayalat sanwar jate hain

aaj is bahr-e-tafakkur ka tamawwuj dekhen

aaj ek aur hi sahra mein utar jate hain

Dub marna hi jo ho to bhi safina chahe

le ke jata hai kinare ko bhanwar jate hain

apni illat ki hum ifa kiye jate hain wo ahd

un ki azmat ki wo har aan mukar jate hain

aur baDh jaen agar naKHun-e-ehsas-e-firaq

zaKHm gahre hon to hon aur nikhar jate hain

hum se Takrane ke hain taur yahin se ho kar

hamein malum hai 'nazir' wo kidhar jate hain