zindagi ke liye itna bhi kya hairan hona

zindagī ke liye itnā bhī kyā hairāñ honā

mujh ko aatā nahīñ be-vaj.h pareshāñ honā

māñgnā jo bhī ho māñgūñgī maiñ apne rab se

maañg kar bande se aayā na pashemāñ honā

yuuñ to guftār meñ māhir haiñ bahut se lekin

itnā āsāñ nahīñ sachchā.ī pe qurbāñ honā

mujh se ulfat hai to bas mere hī ban kar rahnā

bhuul kar bhī na kabhī ġhair ke mehmāñ honā

har ghaḌī tīrgī rahtī hai musallat mujh par

maiñ ne dekhā hī nahīñ dil kā daraḳhshāñ honā

daur-e-hāzir ko lagī kis kī nazar-bad 'zaryāb'

aadmī ko bhī mayassar nahīñ insāñ honā

zindagi ke liye itna bhi kya hairan hona

mujh ko aata nahin be-wajh pareshan hona

mangna jo bhi ho mangungi main apne rab se

mang kar bande se aaya na pasheman hona

yun to guftar mein mahir hain bahut se lekin

itna aasan nahin sachchai pe qurban hona

mujh se ulfat hai to bas mere hi ban kar rahna

bhul kar bhi na kabhi ghair ke mehman hona

har ghaDi tirgi rahti hai musallat mujh par

main ne dekha hi nahin dil ka daraKHshan hona

daur-e-hazir ko lagi kis ki nazar-bad 'zaryab'

aadmi ko bhi mayassar nahin insan hona