zindagi KHwab bhi hai fitna-e-bedar bhi hai

zindagī ḳhvāb bhī hai fitna-e-bedār bhī hai

naġhma-e-amn bhī hai na.ara-e-paikār bhī hai

shauq-e-nazzāra bhī hai jalva-gah-e-yār bhī hai

dekhnā hai ki hameñ jur.at-e-dīdār bhī hai

kaun hai jis ko nahīñ da.avā-e-irfān-e-ḳhudī

is haqīqat se magar koī ḳhabar-dār bhī hai

inqilābāt kā kyā ġham ki unhī ke dam se

raunaq-e-bazm bhī hai garmī-e-bāzār bhī hai

kuchh to ḳhud husn ko hai jalva-numā.ī se gurez

aur kuchh maslahat-e-tālib-e-dīdār bhī hai

garmi-e-ishq meñ donoñ haiñ barābar ke sharīk

sham.a ke soz meñ parvāne kā kirdār bhī hai

apne māhaul kī nā-qadrī-e-paiham kā shikār

aaj kā fan hī nahīñ aaj kā fankār bhī hai

zindagī ishrat-e-paiham hī nahīñ hai 'jauhar'

zindagī jehd-e-musalsal kī talabgār bhī hai

zindagi KHwab bhi hai fitna-e-bedar bhi hai

naghma-e-amn bhi hai nara-e-paikar bhi hai

shauq-e-nazzara bhi hai jalwa-gah-e-yar bhi hai

dekhna hai ki hamein jurat-e-didar bhi hai

kaun hai jis ko nahin dawa-e-irfan-e-KHudi

is haqiqat se magar koi KHabar-dar bhi hai

inqilabaat ka kya gham ki unhi ke dam se

raunaq-e-bazm bhi hai garmi-e-bazar bhi hai

kuchh to KHud husn ko hai jalwa-numai se gurez

aur kuchh maslahat-e-talib-e-didar bhi hai

garmi-e-ishq mein donon hain barabar ke sharik

shama ke soz mein parwane ka kirdar bhi hai

apne mahaul ki na-qadri-e-paiham ka shikar

aaj ka fan hi nahin aaj ka fankar bhi hai

zindagi ishrat-e-paiham hi nahin hai 'jauhar'

zindagi jehd-e-musalsal ki talabgar bhi hai