zindagi ki basti mein hum jahan pe baste hain

zindagī kī bastī meñ ham jahāñ pe baste haiñ

maut kitnī mahñgī hai zaḳhm kitne saste haiñ

zaḳhm-e-zindagī le kar jis taraf bhī jaatā huuñ

multafit nigāhoñ ke tiir se baraste haiñ

mere ik tabassum ko muddateñ huiiñ lekin

aaj tak na jaane kyoñ log mujh pe hañste haiñ

ġham ke ḳhushk sahrā bhī āñsuoñ ke dariyā bhī

zindagī kī manzil tak manziloñ ke raste haiñ

vādī-e-ta'alluq se ik dhuāñ sā uThtā hai

āñsuoñ kī bārish meñ zaḳhm-e-dil jhulaste haiñ

sirf mujh ko baḳhshe haiñ jo tirī nigāhoñ ne

un hasīn zaḳhmoñ ko kitne dil taraste haiñ

mujh se ġham ke maare ko zindagī se kyā matlab

jaane kyoñ ye āvāza log mujh pe kaste haiñ

bhiig bhiig jaatī haiñ kitnī chāñdnī rāteñ

un kī yaad ke bādal duur tak baraste haiñ

ye bhī ik tasarruf hai un hasīñ nigāhoñ kā

'badr' mere zaḳhm-e-dil phuul ban ke hañste haiñ

zindagi ki basti mein hum jahan pe baste hain

maut kitni mahngi hai zaKHm kitne saste hain

zaKHm-e-zindagi le kar jis taraf bhi jata hun

multafit nigahon ke tir se baraste hain

mere ek tabassum ko muddaten huin lekin

aaj tak na jaane kyon log mujh pe hanste hain

gham ke KHushk sahra bhi aansuon ke dariya bhi

zindagi ki manzil tak manzilon ke raste hain

wadi-e-ta'alluq se ek dhuan sa uThta hai

aansuon ki barish mein zaKHm-e-dil jhulaste hain

sirf mujh ko baKHshe hain jo teri nigahon ne

un hasin zaKHmon ko kitne dil taraste hain

mujh se gham ke mare ko zindagi se kya matlab

jaane kyon ye aawaza log mujh pe kaste hain

bhig bhig jati hain kitni chandni raaten

un ki yaad ke baadal dur tak baraste hain

ye bhi ek tasarruf hai un hasin nigahon ka

'badr' mere zaKHm-e-dil phul ban ke hanste hain