zindagi ki jo saat jis ke hath aai hai

zindagī kī jo saa.at jis ke haath aa.ī hai

ḳhuub soch kar barte chiiz to parā.ī hai

maiñ ne mard-e-haq ban kar jab nazar uThā.ī hai

merā sāmnā karte maut hichkichā.ī hai

ḳhalvat-e-tamanna hai ġham raqīb kā kyoñ ho

aap ye to farmā deñ kyoñ nazar churā.ī hai

eqtidār ke bande jab hue haiñ matvāle

inqalāb kī turshī vaqt ne chakhā.ī hai

muzhda-e-marīz-e-ġham vaqt-e-mudda.ā aaya

raushnī sitāroñ kī dekh jhilmilā.ī hai

aap hoñ ḳhafā mujh se yā maiñ aap se nādim

vo bhī jag-hañsā.ī hai ye bhī jag-hañsā.ī hai

hai qarīb ajal 'hasrat' ab to hosh meñ aa.eñ

zindagī to ġhaflat se aap ne gañvā.ī hai

zindagi ki jo saat jis ke hath aai hai

KHub soch kar barte chiz to parai hai

main ne mard-e-haq ban kar jab nazar uThai hai

mera samna karte maut hichkichai hai

KHalwat-e-tamanna hai gham raqib ka kyon ho

aap ye to farma den kyon nazar churai hai

eqtidar ke bande jab hue hain matwale

inqalab ki turshi waqt ne chakhai hai

muzhda-e-mariz-e-gham waqt-e-muddaa aaya

raushni sitaron ki dekh jhilmilai hai

aap hon KHafa mujh se ya main aap se nadim

wo bhi jag-hansai hai ye bhi jag-hansai hai

hai qarib ajal 'hasrat' ab to hosh mein aaen

zindagi to ghaflat se aap ne ganwai hai