zindagi ki sham hai izn-e-safar hone ko hai

zindagī kī shaam hai izn-e-safar hone ko hai

ik musāfir vo huuñ jo ki dar-ba-dar hone ko hai

dāġh-dār is dil ko le kar ham kahāñ ab jā.eñge

fitna-gar vo shahr-bhar meñ jalva-gar hone ko hai

jo hamārī jaan the hone lage haiñ ajnabī

kaisā kaisā zaḳhm kaarī ruuh par hone ko hai

ai shab-e-ġham tū batā in hasratoñ se kyā kaheñ

bach rahī haiñ chand sāñseñ aur sahar hone ko hai

ik balā ke baa'd phir se ik balā aatī rahī

lāzmī ik zarb ham par kārgar hone ko hai

dāstān-e-ġham sunā kar vo to uTh kar chal diye

phir se ham par ġham kī bārish tāza-tar hone ko hai

haiñ mirī āñkhoñ meñ aañsū aur laboñ par jaan hai

zindagī ai zindagī tū muḳhtasar hone ko hai

jo ki māñgī thiiñ duā.eñ kho ga.iiñ jaane kahāñ

kuchh hai ghabrāhaT ki ye sab be-asar hone ko hai

un kā aanā thā ki saare bām-o-dar sajne lage

ḳhushnumā is shahr kī har rahguzar hone ko hai

bas nazar kī baat thī jo ham ko ghāyal kar ga.ī

qatl-gāh-e-ishq kī ham par nazar hone ko hai

kuchh to aisī baat hai vo baam par aane lage

kis pe maa.il āj-kal bedād-gar hone ko hai

ham ne 'barham' dekh lī ye zindagī vo zindagī

dekhte hī dekhte ḳhūn-e-jigar hone ko hai

zindagi ki sham hai izn-e-safar hone ko hai

ek musafir wo hun jo ki dar-ba-dar hone ko hai

dagh-dar is dil ko le kar hum kahan ab jaenge

fitna-gar wo shahr-bhar mein jalwa-gar hone ko hai

jo hamari jaan the hone lage hain ajnabi

kaisa kaisa zaKHm kari ruh par hone ko hai

ai shab-e-gham tu bata in hasraton se kya kahen

bach rahi hain chand sansen aur sahar hone ko hai

ek bala ke ba'd phir se ek bala aati rahi

lazmi ek zarb hum par kargar hone ko hai

dastan-e-gham suna kar wo to uTh kar chal diye

phir se hum par gham ki barish taza-tar hone ko hai

hain meri aankhon mein aansu aur labon par jaan hai

zindagi ai zindagi tu muKHtasar hone ko hai

jo ki mangi thin duaen kho gain jaane kahan

kuchh hai ghabrahaT ki ye sab be-asar hone ko hai

un ka aana tha ki sare baam-o-dar sajne lage

KHushnuma is shahr ki har rahguzar hone ko hai

bas nazar ki baat thi jo hum ko ghayal kar gai

qatl-gah-e-ishq ki hum par nazar hone ko hai

kuchh to aisi baat hai wo baam par aane lage

kis pe mail aaj-kal bedad-gar hone ko hai

hum ne 'barham' dekh li ye zindagi wo zindagi

dekhte hi dekhte KHun-e-jigar hone ko hai