zindagi ki talKHiyon par KHak Dali jaegi

zindagī kī talḳhiyoñ par ḳhaak Daalī jā.egī

is tarah se zindagī āsāñ banā lī jā.egī

surḳh āñkheñ zard chehra sard aa.heñ dil udaas

ab kisī sūrat to ye sūrat sañbhālī jā.egī

majlisī maanā tabassum hai laboñ par in dinoñ

is pe ummīdoñ kī phir se niiñv Daalī jā.egī

pairahan ye hasratoñ kā ab rafū hogā janāb

har ḳhushī jo ruuTh baiThī thī manā lī jā.egī

zindagī ke isti’āre phir badal jā.eñge ab

phir tamannā ḳhūb-sūrat dil meñ paalī jā.egī

dard-o-ġham kī ab yahāñ tāsīr ulTegī miyāñ

choT bhī dil kī hunar apnā banā lī jā.egī

chiir degī āsmāñ tak kā kaleja ek din

mat samajhnā āh-e-bekas hai to kHālī jā.egī

ham badal Dāleñge likkhā kātib-e-taqdīr kā

apnī qismat apne hāthoñ se sajā lī jā.egī

qahqahe gūñjeñge har pal ab fazāoñ meñ 'karan'

dard kī ab roz-o-shab mayyat nikālī jā.egī

zindagi ki talKHiyon par KHak Dali jaegi

is tarah se zindagi aasan bana li jaegi

surKH aankhen zard chehra sard aahen dil udas

ab kisi surat to ye surat sanbhaali jaegi

majlisi mana tabassum hai labon par in dinon

is pe ummidon ki phir se ninw Dali jaegi

pairahan ye hasraton ka ab rafu hoga janab

har KHushi jo ruTh baiThi thi mana li jaegi

zindagi ke isti’are phir badal jaenge ab

phir tamanna KHub-surat dil mein pali jaegi

dard-o-gham ki ab yahan tasir ulTegi miyan

choT bhi dil ki hunar apna bana li jaegi

chir degi aasman tak ka kaleja ek din

mat samajhna aah-e-bekas hai to kHali jaegi

hum badal Dalenge likkha katib-e-taqdir ka

apni qismat apne hathon se saja li jaegi

qahqahe gunjenge har pal ab fazaon mein 'karan'

dard ki ab roz-o-shab mayyat nikali jaegi