zindagi ki talKHiyon par muskuraun kyon bhala

zindagī kī talḳhiyoñ par muskurā.ūñ kyoñ bhalā

hañs ke har ġham ko maiñ siine se lagā.ūñ kyoñ bhalā

āshnā huuñ maiñ muqaddar kī haqīqat se nadīm

phir 'amal kī zindagī se jī churā.ūñ kyoñ bhalā

anginat yād-e-havādis ā.eñge ai nāḳhudā

apnī kashtī ko na tūfāñ se bachā.ūñ kyoñ bhalā

tum mujhe fasl-e-ḳhizāñ kā ḳhauf kyoñ dete rahe

maiñ kabhī phūloñ kī ḳhushbū tak na pā.ūñ kyoñ bhalā

is jahāñ meñ kaun jaltā hai parā.ī aag meñ

ashk-e-ḳhūñ maiñ apnī āñkhoñ se girā.ūñ kyoñ bhalā

zindagi ki talKHiyon par muskuraun kyon bhala

hans ke har gham ko main sine se lagaun kyon bhala

aashna hun main muqaddar ki haqiqat se nadim

phir 'amal ki zindagi se ji churaun kyon bhala

anginat yaad-e-hawadis aaenge ai naKHuda

apni kashti ko na tufan se bachaun kyon bhala

tum mujhe fasl-e-KHizan ka KHauf kyon dete rahe

main kabhi phulon ki KHushbu tak na paun kyon bhala

is jahan mein kaun jalta hai parai aag mein

ashk-e-KHun main apni aankhon se giraun kyon bhala