zindagi ki tarjumani aur main

zindagī kī tarjumānī aur maiñ

jaise dariyā kī ravānī aur maiñ

dam-ba-dam karte haiñ terā tazkira

terī tasvīreñ purānī aur maiñ

phir nikal aa.e haiñ sahrā kī taraf

vahshat-e-dil jāñ-fishānī aur maiñ

aa.ine be-chehragī kī daad haiñ

ek āshufta kahānī aur maiñ

diid kī tālib haiñ terī chārāgar

chashm-e-pur-nam rut ḳhizānī aur maiñ

bas yahī kuchh thā ta'alluq kā sabab

mere dil kī ḳhush-gumānī aur maiñ

manzileñ gum-gashta rāheñ aur tū

'ishrat-e-‘ahd-e-javānī aur maiñ

zindagi ki tarjumani aur main

jaise dariya ki rawani aur main

dam-ba-dam karte hain tera tazkira

teri taswiren purani aur main

phir nikal aae hain sahra ki taraf

wahshat-e-dil jaan-fishani aur main

aaine be-chehragi ki dad hain

ek aashufta kahani aur main

did ki talib hain teri chaaragar

chashm-e-pur-nam rut KHizani aur main

bas yahi kuchh tha ta'alluq ka sabab

mere dil ki KHush-gumani aur main

manzilen gum-gashta rahen aur tu

'ishrat-e-‘ahd-e-jawani aur main