zindagi ko gham-e-jaanan ke hawale kar dun

zindagī ko ġham-e-jānāñ ke havāle kar duuñ

jis kā Dar hai usī tūfāñ ke havāle kar duuñ

laao ab lutf-e-bahārāñ meñ izāfe ke liye

āshiyāñ jashn-e-bahārāñ ke havāle kar duuñ

dāman-e-‘aql meñ ye chain se rah saktā hai

dil-e-nādāñ ko nigahbāñ ke havāle kar duuñ

ḳhvāb-e-ummīd kī tā'bīr mirā īmāñ hai

kyoñ ise zehn-e-pareshāñ ke havāle kar duuñ

dil ke badle mire pahlū meñ hai mauj-e-larzāñ

kyā ise dīda-e-giryāñ ke havāle kar duuñ

har nafas meñ anal-insāñ kā hai naġhma pinhāñ

maiñ ise sāz-e-rag-e-jāñ ke havāle kar duuñ

jo añdherā nazar aatā hai charāġhoñ ke tale

kyoñ na maiñ us ko shabistāñ ke havāle kar duuñ

mujh se baḌh kar koī bad-zauq bhalā kyā hogā

maiñ agar dard ko darmāñ ke havāle kar duuñ

us ne duniyā ko banāyā bhī sañvārā bhī 'urūj'

phir ye sochā ise insāñ ke havāle kar duuñ

zindagi ko gham-e-jaanan ke hawale kar dun

jis ka Dar hai usi tufan ke hawale kar dun

lao ab lutf-e-bahaaran mein izafe ke liye

aashiyan jashn-e-bahaaran ke hawale kar dun

daman-e-‘aql mein ye chain se rah sakta hai

dil-e-nadan ko nigahban ke hawale kar dun

KHwab-e-ummid ki ta'bir mera iman hai

kyon ise zehn-e-pareshan ke hawale kar dun

dil ke badle mere pahlu mein hai mauj-e-larzan

kya ise dida-e-giryan ke hawale kar dun

har nafas mein anal-insan ka hai naghma pinhan

main ise saz-e-rag-e-jaan ke hawale kar dun

jo andhera nazar aata hai charaghon ke tale

kyon na main us ko shabistan ke hawale kar dun

mujh se baDh kar koi bad-zauq bhala kya hoga

main agar dard ko darman ke hawale kar dun

us ne duniya ko banaya bhi sanwara bhi 'uruj'

phir ye socha ise insan ke hawale kar dun