zindagi kuchh soz hai kuchh saz hai

zindagī kuchh soz hai kuchh saaz hai

duur tak bikhrī huī āvāz hai

ḳhāmushī us kī hai misl-e-guftugū

har nazar jazbāt kī ġhammāz hai

kis tarah zinda huuñ tujh ko dekh kar

zindagī mujh par tabassum-sāz hai

jāñ-fazā naġhmāt kā ḳhāliq hai ye

dil agarche ik shikasta saaz hai

is tarah qaa.em hai raqs-e-zindagī

saaz us kā hai mirī āvāz hai

kyā batā.ūñ aaj ke is daur meñ

aadmī kitnā zamāna-sāz hai

is liye rakhtā huuñ maiñ us ko aziiz

haq-parastī ruuh kī āvāz hai

bāḳhtan hai pattharoñ kī sarzamīñ

phir bhī mujh ko is pe kitnā naaz hai

manzil-e-maqsūd tak pahuñchegī 'arsh'

ruk na pā.egī mirī āvāz hai

zindagi kuchh soz hai kuchh saz hai

dur tak bikhri hui aawaz hai

KHamushi us ki hai misl-e-guftugu

har nazar jazbaat ki ghammaz hai

kis tarah zinda hun tujh ko dekh kar

zindagi mujh par tabassum-saz hai

jaan-faza naghmat ka KHaliq hai ye

dil agarche ek shikasta saz hai

is tarah qaem hai raqs-e-zindagi

saz us ka hai meri aawaz hai

kya bataun aaj ke is daur mein

aadmi kitna zamana-saz hai

is liye rakhta hun main us ko aziz

haq-parasti ruh ki aawaz hai

baKHtan hai pattharon ki sarzamin

phir bhi mujh ko is pe kitna naz hai

manzil-e-maqsud tak pahunchegi 'arsh'

ruk na paegi meri aawaz hai