zindagi mange hai KHwabon ke KHaridar bahut

zindagī māñge hai ḳhvāboñ ke ḳharīdār bahut

raah roke hai magar vaqt kī dīvār bahut

taaza riste hue zaḳhmoñ ke kañval mahkāo

gulshan-e-zīst meñ aa.e haiñ ḳharīdār bahut

chand paisoñ ke liye jin ke qalam bikte haiñ

tum ko mil jā.eñge hotel meñ vo fankār bahut

ghol do jaam meñ maḳhmūr nigāhoñ kā nasha

yād-e-māzī se hai bechain ye mai-ḳhvār bahut

taaza phūloñ ko mirī mez pe rakhne vaale

yaad aa.egā mahaktā huā ye pyaar bahut

ek tum hote to jiine kī tamanna hotī

yuuñ to har gaam pe milte rahe mai-ḳhvār bahut

ek farsūda rivāyat ke sivā kuchh bhī nahīñ

pyaar ke naam pe sajte haiñ jo bāzār bahut

us kā mīThā vo tarannum vo ġhazal 'sādiq' kī

yaad aatā hai vo tanhā.ī meñ dildār bahut

zindagi mange hai KHwabon ke KHaridar bahut

rah roke hai magar waqt ki diwar bahut

taza riste hue zaKHmon ke kanwal mahkao

gulshan-e-zist mein aae hain KHaridar bahut

chand paison ke liye jin ke qalam bikte hain

tum ko mil jaenge hotel mein wo fankar bahut

ghol do jam mein maKHmur nigahon ka nasha

yaad-e-mazi se hai bechain ye mai-KHwar bahut

taza phulon ko meri mez pe rakhne wale

yaad aaega mahakta hua ye pyar bahut

ek tum hote to jine ki tamanna hoti

yun to har gam pe milte rahe mai-KHwar bahut

ek farsuda riwayat ke siwa kuchh bhi nahin

pyar ke nam pe sajte hain jo bazar bahut

us ka miTha wo tarannum wo ghazal 'sadiq' ki

yaad aata hai wo tanhai mein dildar bahut