zindagi meri kabhi gham se juda ho na saki

zindagī merī kabhī ġham se judā ho na sakī

dard baḌhtā hī gayā aur davā ho na sakī

zindagī maiñ ne bahut naaz uThā.e tere

ye alag baat ki tujh se hī vafā ho na sakī

jaane kis daur meñ kyā jurm kiyā thā ham ne

zindagī biit ga.ī ḳhatm sazā na ho sakī

phuul hī phuul haiñ har shāḳh-e-gulistāñ pe magar

merī taqdīr hī afsos rasā ho na sakī

saath sab chhoḌ ga.e hijr meñ merā lekin

kyoñ tirī yaad mire dil se judā ho na sakī

aadmī TuuT gayā justujū karte karte

zindagī dām-e-musībat se rihā ho na sakī

bichh ga.ī dhuup har ik samt ujāloñ kī magar

duur dil se mire zulmat kī ghaTā ho na sakī

sochtā rahtā huuñ aksar shab-e-tanhā.ī meñ

zindagī kyoñ mirī marhūn-e-duā ho na sakī

kyā ajab chiiz hai iz.hār-e-mohabbat bhī 'sahar'

baat lamhoñ kī thī sadiyoñ meñ adā ho na sakī

zindagi meri kabhi gham se juda ho na saki

dard baDhta hi gaya aur dawa ho na saki

zindagi main ne bahut naz uThae tere

ye alag baat ki tujh se hi wafa ho na saki

jaane kis daur mein kya jurm kiya tha hum ne

zindagi bit gai KHatm saza na ho saki

phul hi phul hain har shaKH-e-gulistan pe magar

meri taqdir hi afsos rasa ho na saki

sath sab chhoD gae hijr mein mera lekin

kyon teri yaad mere dil se juda ho na saki

aadmi TuT gaya justuju karte karte

zindagi dam-e-musibat se riha ho na saki

bichh gai dhup har ek samt ujalon ki magar

dur dil se mere zulmat ki ghaTa ho na saki

sochta rahta hun aksar shab-e-tanhai mein

zindagi kyon meri marhun-e-dua ho na saki

kya ajab chiz hai izhaar-e-mohabbat bhi 'sahar'

baat lamhon ki thi sadiyon mein ada ho na saki