zindagi naz kare jis pe wo pahchan bane

zindagī naaz kare jis pe vo pahchān bane

dekhiye aaj kā insān kab insān bane

ek afsāna mohabbat kā likhā thā ham ne

aur duniyā ke liye saikḌoñ unvān bane

sabr aur shukr kī manzil se vo guzrā hī nahīñ

jo pareshāñ na huā aur pareshān bane

kyā kahūñ is ke sivā aur mohabbat kyā hai

dil kī rag rag meñ samā kar vo mirī jaan bane

zindagī meñ mirī ik aisā bhī vaqt aaya hai

jānñe vaale mujhe dekh ke anjān bane

ishq meñ ḳhāna-e-dil donoñ ke vīrān rahe

mujh ko mehmān banāyā na vo mehmān bane

chand kāñToñ ke sivā shāḳhoñ meñ rakkhā kyā hai

kaun aise meñ gulistāñ kā nigahbān bane

mil gayā jahd-e-musalsal kā sila mujh ko 'la.īq'

kal ke ġham aaj mire aish kā sāmān bane

zindagi naz kare jis pe wo pahchan bane

dekhiye aaj ka insan kab insan bane

ek afsana mohabbat ka likha tha hum ne

aur duniya ke liye saikDon unwan bane

sabr aur shukr ki manzil se wo guzra hi nahin

jo pareshan na hua aur pareshan bane

kya kahun is ke siwa aur mohabbat kya hai

dil ki rag rag mein sama kar wo meri jaan bane

zindagi mein meri ek aisa bhi waqt aaya hai

jaanne wale mujhe dekh ke anjaan bane

ishq mein KHana-e-dil donon ke viran rahe

mujh ko mehman banaya na wo mehman bane

chand kanTon ke siwa shaKHon mein rakkha kya hai

kaun aise mein gulistan ka nigahban bane

mil gaya jahd-e-musalsal ka sila mujh ko 'laiq'

kal ke gham aaj mere aish ka saman bane