zindagi pai hai ek chashm-e-sitam-gar ki tarah

zindagī paa.ī hai ik chashm-e-sitam-gar kī tarah

ham pareshāñ haiñ ġharīboñ ke muqaddar kī tarah

apnā tan karb-o-balā ban ke jalā hai barsoñ

ham bhī pyāse haiñ bahut āl-e-payambar kī tarah

ab koī raam nahīñ ġham kā dhanush jo toḌe

zindagī rotī hai siitā ke svayamvar kī tarah

ham ne chāhā thā ki ham apnī tarah se jī leñ

ham pe ilzām barasne lage patthar kī tarah

roz jī uThte haiñ sūraj kī kiran ke hamrāh

aur mar jaate haiñ har shaam samundar kī tarah

jaate rastoñ meñ kahāñ us ko gañvā aa.e 'hasan'

ek naqsha sā nigāhoñ meñ jo thā ghar kī tarah

zindagi pai hai ek chashm-e-sitam-gar ki tarah

hum pareshan hain gharibon ke muqaddar ki tarah

apna tan karb-o-bala ban ke jala hai barson

hum bhi pyase hain bahut aal-e-payambar ki tarah

ab koi ram nahin gham ka dhanush jo toDe

zindagi roti hai sita ke swayamwar ki tarah

hum ne chaha tha ki hum apni tarah se ji len

hum pe ilzam barasne lage patthar ki tarah

roz ji uThte hain suraj ki kiran ke hamrah

aur mar jate hain har sham samundar ki tarah

jate raston mein kahan us ko ganwa aae 'hasan'

ek naqsha sa nigahon mein jo tha ghar ki tarah