zindagi sath faqat degi sahar hone tak

zindagī saath faqat degī sahar hone tak

kab ye sochā thā kabhī mulk-badar hone tak

kaun kab ruuTh gayā kis ko kahāñ bhuul ga.e

aao kuchh yaad kareñ ḳhatm safar hone tak

chand aañsū jo tirā tohfa hai lauTā.eñge

haañ chhupā rakkhe haiñ āñkhoñ meñ guhar hone tak

mujh ko kuchh paudoñ kā zimma jo diyā hai yārab

yaad bhī rakhnā zarā un ke shajar hone tak

āñdhiyāñ ā.eñgī tūfān bhī dam toḌeñge

ham jiye jā.eñge phūloñ se samar hone tak

zindagī mere taġhāful se to nārāz na ho

tujh se kyā pūchhtā maiñ apnī ḳhabar hone tak

us se itnā hī zarā pūchh le kyā biit gayā

dil ye kab ruktā hai phir aañkh ke tar hone tak

ham ne chāhat ke kisī saaz pe jo haath dharā

tham gayā dard har ik dard-e-jigar hone tak

zindagī tujh se mohabbat to bahut hai lekin

ruuTh jaa.eñ na kahīñ terī nazar hone tak

chaah jab aah se guzre to 'rishī' ban jaa.e

aur phir jī le kisī dasht ke ghar hone tak

zindagi sath faqat degi sahar hone tak

kab ye socha tha kabhi mulk-badar hone tak

kaun kab ruTh gaya kis ko kahan bhul gae

aao kuchh yaad karen KHatm safar hone tak

chand aansu jo tera tohfa hai lauTaenge

han chhupa rakkhe hain aankhon mein guhar hone tak

mujh ko kuchh paudon ka zimma jo diya hai yarab

yaad bhi rakhna zara un ke shajar hone tak

aandhiyan aaengi tufan bhi dam toDenge

hum jiye jaenge phulon se samar hone tak

zindagi mere taghaful se to naraaz na ho

tujh se kya puchhta main apni KHabar hone tak

us se itna hi zara puchh le kya bit gaya

dil ye kab rukta hai phir aankh ke tar hone tak

hum ne chahat ke kisi saz pe jo hath dhara

tham gaya dard har ek dard-e-jigar hone tak

zindagi tujh se mohabbat to bahut hai lekin

ruTh jaen na kahin teri nazar hone tak

chah jab aah se guzre to 'rishi' ban jae

aur phir ji le kisi dasht ke ghar hone tak