zindagi saz-e-shikasta ki fughan hi to nahin

zindagī sāz-e-shikasta kī fuġhāñ hī to nahīñ

zamzama-sanj bhī hai marsiyāñ-ḳhvāñ hī to nahīñ

ishq se baaz ham aate jo guzartā vo garāñ

lutf to ye hai tabī.at pe garāñ hī to nahīñ

dil burā kījiye kis tarah bhalā phir us se

rāhat-e-jāñ bhī to hai āfat-e-jāñ hī to nahīñ

aisī yādeñ bhī haiñ sau zindagiyāñ jin pe nisār

hāsil-e-zīst ġham-e-umr-e-ravāñ hī to nahīñ

ham samajhte haiñ jo apne ko baḌā ahl-e-nazar

ye bhī faiz-e-nazar-e-ḳhush-nazrāñ hī to nahīñ

qāfile meñ haiñ bahut rāhravāñ bhī to sharīk

rahbarāñ hī to nahīñ rāh-zanāñ hī to nahīñ

hai bahut naaz tujhe zabt-e-fuġhāñ par 'fazlī'

ye ḳhamoshī bhī kahīñ tarz-e-fuġhāñ hī to nahīñ

zindagi saz-e-shikasta ki fughan hi to nahin

zamzama-sanj bhi hai marsiyan-KHwan hi to nahin

ishq se baz hum aate jo guzarta wo garan

lutf to ye hai tabiat pe garan hi to nahin

dil bura kijiye kis tarah bhala phir us se

rahat-e-jaan bhi to hai aafat-e-jaan hi to nahin

aisi yaaden bhi hain sau zindagiyan jin pe nisar

hasil-e-zist gham-e-umr-e-rawan hi to nahin

hum samajhte hain jo apne ko baDa ahl-e-nazar

ye bhi faiz-e-nazar-e-KHush-nazran hi to nahin

qafile mein hain bahut rahrawan bhi to sharik

rahbaran hi to nahin rah-zanan hi to nahin

hai bahut naz tujhe zabt-e-fughan par 'fazli'

ye KHamoshi bhi kahin tarz-e-fughan hi to nahin