zindagi se pas lekin husn ke qisse se dur

zindagī se paas lekin husn ke qisse se duur

ham ġhazal rakhte haiñ apnī zulf ke saa.e se duur

ham se jin ko unsiyat hai vo khiñche aa jā.eñge

un ko kyā nazdīk laa.eñ jo haiñ ḳhud pahle se duur

jaane kaise karb ubhre mere chehre par ki jo

vo nigāheñ apnī rakhte haiñ mire chehre se duur

ek lamha pyaar kā jis ko mile vo surḳh-rū

kyuuñ mujhe rakkhā gayā phir ik isī lamhe se duur

zabt karnā kitnā mushkil thā mujhe ma.alūm hai

zindagī ko phir bhī rakkhā maiñ ne har fitne se duur

zulm kar ke tū adālat se agar bach bhī gayā

soch bhāgegā kahāñ tak āsmāñ vaale se duur

āḳhirash ashkoñ ke chalte hī duā puurī huī

tum ne aḳhtar jin ko rakkhā aaj tak apne se duur

zindagi se pas lekin husn ke qisse se dur

hum ghazal rakhte hain apni zulf ke sae se dur

hum se jin ko unsiyat hai wo khinche aa jaenge

un ko kya nazdik laen jo hain KHud pahle se dur

jaane kaise karb ubhre mere chehre par ki jo

wo nigahen apni rakhte hain mere chehre se dur

ek lamha pyar ka jis ko mile wo surKH-ru

kyun mujhe rakkha gaya phir ek isi lamhe se dur

zabt karna kitna mushkil tha mujhe malum hai

zindagi ko phir bhi rakkha main ne har fitne se dur

zulm kar ke tu adalat se agar bach bhi gaya

soch bhagega kahan tak aasman wale se dur

aaKHirash ashkon ke chalte hi dua puri hui

tum ne aKHtar jin ko rakkha aaj tak apne se dur