zindagi sham ko daftar se nikal aati hai

zindagī shaam ko daftar se nikal aatī hai

aur udāsī mire andar se nikal aatī hai

chādareñ jitnī bhī tabdīl karūñ tere baad

terī ḳhushbū mire bistar se nikal aatī hai

maiñ huuñ vo aag ki jis aag ko chakhne ke liye

jal-parī chal ke samundar se nikal aatī hai

jis qadar aap batāte haiñ mujhe sahrā meñ

itnī vīrānī mire ghar se nikal aatī hai

jab bhī hotī hai charāġhoñ se mulāqāt mirī

lahlahā kar mirī lau sar se nikal aatī hai

hazrat-e-hur ne nikal kar ye dikhāyā ham ko

raushnī raat ke lashkar se nikal aatī hai

shaam ke vaqt samundar meñ lahū ghulte hī

terī sūrat mire sāġhar se nikal aatī hai

kahāñ dabtī hai dabāne se mohabbat 'armān'

ye vo koñpal hai jo patthar se nikal aatī hai

zindagi sham ko daftar se nikal aati hai

aur udasi mere andar se nikal aati hai

chadaren jitni bhi tabdil karun tere baad

teri KHushbu mere bistar se nikal aati hai

main hun wo aag ki jis aag ko chakhne ke liye

jal-pari chal ke samundar se nikal aati hai

jis qadar aap batate hain mujhe sahra mein

itni virani mere ghar se nikal aati hai

jab bhi hoti hai charaghon se mulaqat meri

lahlaha kar meri lau sar se nikal aati hai

hazrat-e-hur ne nikal kar ye dikhaya hum ko

raushni raat ke lashkar se nikal aati hai

sham ke waqt samundar mein lahu ghulte hi

teri surat mere saghar se nikal aati hai

kahan dabti hai dabane se mohabbat 'arman'

ye wo konpal hai jo patthar se nikal aati hai