zindagi soz bane saz na hone pae

zindagī soz bane saaz na hone paa.e

dil to TuuTe magar āvāz na hone paa.e

dard agar shāmil-e-āvāz na hone paa.e

koī monis koī dam-sāz na hone paa.e

jaam se kuchh ko pilā kuchh ko nigāhoñ se magar

koī mai-kash nazar-andāz na hone paa.e

lutf jab hai ki rahe ishq sadā mahv-e-niyāz

aur is baat pe bhī naaz na hone paa.e

ḳhud ko karnā hai junūñ ke jo havāle to ye sun

aql hargiz ḳhalal-andāz na hone paa.e

jis meñ anjām kā ho ḳhauf sadā dāman-gīr

aise afsāne kā āġhāz na hone paa.e

ishq aur husn mileñ mil ke ḳhudā ban jaa.eñ

gar havas tafraqa-andāz na hone paa.e

āshiyāñ kunj-e-qafas se bhī girāñ-tar ho 'sahar'

gar muāvin par-e-parvāz na hone paa.e

zindagi soz bane saz na hone pae

dil to TuTe magar aawaz na hone pae

dard agar shamil-e-awaz na hone pae

koi monis koi dam-saz na hone pae

jam se kuchh ko pila kuchh ko nigahon se magar

koi mai-kash nazar-andaz na hone pae

lutf jab hai ki rahe ishq sada mahw-e-niyaz

aur is baat pe bhi naz na hone pae

KHud ko karna hai junun ke jo hawale to ye sun

aql hargiz KHalal-andaz na hone pae

jis mein anjam ka ho KHauf sada daman-gir

aise afsane ka aaghaz na hone pae

ishq aur husn milen mil ke KHuda ban jaen

gar hawas tafraqa-andaz na hone pae

aashiyan kunj-e-qafas se bhi giran-tar ho 'sahar'

gar muawin par-e-parwaz na hone pae