zindagi teri adaon ka parastar hun main

zindagī terī adāoñ kā parastār huuñ maiñ

koī qīmat ho magar terā ḳharīdār huuñ maiñ

muftiyo muhtasibo haañ mujhe maslūb karo

zindagī jurm agar hai to ḳhatāvār huuñ maiñ

merī ġhairat ko kuchal do mujhe pāmāl karo

aaj ke daur meñ hai jurm ki ḳhud.dār huuñ maiñ

log haiñ merī ġharībī ke ḳharīdār bahut

āḳhrī daur kā luTtā huā bāzār huuñ maiñ

ek din maiñ bhī thā maz.hab ke parastāroñ meñ

aaj maz.hab kā hai nīlām to bezār huuñ maiñ

fikr-e-'ġhālib' se huā qadr-shanās-e-'ġhālib'

kaun kahtā hai ki 'ġhālib' kā taraf-dār huuñ maiñ

shā.erī ko na.ī qadroñ se sañvārā hai 'payām'

na.ī duniyā meñ na.ī fikr kā fan-kār huuñ maiñ

zindagi teri adaon ka parastar hun main

koi qimat ho magar tera KHaridar hun main

muftiyo muhtasibo han mujhe maslub karo

zindagi jurm agar hai to KHatawar hun main

meri ghairat ko kuchal do mujhe pamal karo

aaj ke daur mein hai jurm ki KHuddar hun main

log hain meri gharibi ke KHaridar bahut

aaKHri daur ka luTta hua bazar hun main

ek din main bhi tha mazhab ke parastaron mein

aaj mazhab ka hai nilam to bezar hun main

fikr-e-'ghaalib' se hua qadr-shanas-e-'ghaalib'

kaun kahta hai ki 'ghaalib' ka taraf-dar hun main

shaeri ko nai qadron se sanwara hai 'payam'

nai duniya mein nai fikr ka fan-kar hun main