zindagi tujhse bahut aaj main sharminda hun

zindagī tujh se bahut aaj maiñ sharminda huuñ

maut har saañs meñ aatī hai magar zinda huuñ

jab koī raag maiñ chheḌūñ to barastā hai lahū

jis kā har saaz shikasta hai vo sāzinda huuñ

jhuuT hotā na jo sach bhī na jahāñ meñ hotā

tīrgī saath hai is vāste tābinda huuñ

mujh ko aatā nahīñ duniyā kī ġhulāmī karnā

apne jazbāt-o-ḳhayālāt kā kārinda huuñ

mar ke bhī zinda maiñ ho jā.ūñgā mujh ko hai yaqīñ

maut ko aa.egī ḳhud maut maiñ pā.inda huuñ

apne nāḳhun se jo chheḌūñ to maza aatā hai

dil ke sūkhe hue zaḳhmoñ kā maiñ ḳhārinda huuñ

sach hai 'tauqīr' ki kīchaḌ meñ kañval khiltā hai

bevafā shahr hai jis shahr kā bāshinda huuñ

zindagi tujh se bahut aaj main sharminda hun

maut har sans mein aati hai magar zinda hun

jab koi rag main chheDun to barasta hai lahu

jis ka har saz shikasta hai wo sazinda hun

jhuT hota na jo sach bhi na jahan mein hota

tirgi sath hai is waste tabinda hun

mujh ko aata nahin duniya ki ghulami karna

apne jazbaat-o-KHayalat ka karinda hun

mar ke bhi zinda main ho jaunga mujh ko hai yaqin

maut ko aaegi KHud maut main painda hun

apne naKHun se jo chheDun to maza aata hai

dil ke sukhe hue zaKHmon ka main KHarinda hun

sach hai 'tauqir' ki kichaD mein kanwal khilta hai

bewafa shahr hai jis shahr ka bashinda hun