zindagi yun to bahut ayyar thi chaalak thi

zindagī yuuñ to bahut ayyār thī chālāk thī

maut ne chhū kar jo dekhā ek muTThī ḳhaak thī

jāgtī āñkhoñ ke sapne dil-nashīñ to the magar

mere har ik ḳhvāb kī ta.abīr haibatnāk thī

aaj kāñTe bhī chhupā.e haiñ libādoñ meñ badan

ik zamāne meñ to fasl-e-gul bhī dāman chaak thī

thā hameñ bhī har qadam pe naak kaT jaane kā Dar

un dinoñ kī baat hai jab apne muñh par naak thī

thā laḌakpan kā zamāna sarfaroshī se bharā

ham usī talvār par marte the jo saffāk thī

dostoñ ke darmiyāñ sach bolte Dartā hai vo

dushmanoñ kī bhiiḌ meñ jis kī zabāñ be-bāk thī

zindagi yun to bahut ayyar thi chaalak thi

maut ne chhu kar jo dekha ek muTThi KHak thi

jagti aankhon ke sapne dil-nashin to the magar

mere har ek KHwab ki tabir haibatnak thi

aaj kanTe bhi chhupae hain libaadon mein badan

ek zamane mein to fasl-e-gul bhi daman chaak thi

tha hamein bhi har qadam pe nak kaT jaane ka Dar

un dinon ki baat hai jab apne munh par nak thi

tha laDakpan ka zamana sarfaroshi se bhara

hum usi talwar par marte the jo saffak thi

doston ke darmiyan sach bolte Darta hai wo

dushmanon ki bhiD mein jis ki zaban be-bak thi