ziya-e-husn-e-jaanan jaguzin malum hoti hai

ziyā-e-husn-e-jānāñ jāguzīñ ma.alūm hotī hai

bayāz-e-chashm-e-dil arsh-e-barīñ ma.alūm hotī hai

tirī sūrat bhī kaisī dil-nashīñ ma.alūm hotī hai

ki jis dil meñ use DhūñDo vahīñ ma.alūm hotī hai

asar is darja kar rakkhā hai ḳhauf-e-hijr ne dil par

ki un kī haañ bhī ab mujh ko nahīñ ma.alūm hotī hai

idhar āñkheñ milīñ un se musaḳhḳhar thā idhar āshiq

nigāh-e-dil-rubā sehr-āfrīñ ma.alūm hotī hai

bahār aa.ī hai yā fasl-e-junūñ aa.ī hai gulshan meñ

ik ik gul kī qabā be-āstīñ ma.alūm hotī hai

na niklī hai na ab niklegī mere ḳhāna-e-dil se

ik ik hasrat mirī ḳhalvat-nashīñ ma.alūm hotī hai

kuchh aisā ho gayā chashm-e-kahīl-e-yār kā saudā

ki nargis bhī mujhe ab surmagīñ ma.alūm hotī hai

ghulāyā mujh ko rafta-rafta yār-e-zulf-e-barham ne

mohabbat us kī mār-e-āstīñ ma.alūm hotī hai

kaTe ham ḳhauf se bal un kī peshānī pe kyā aaya

koī shamshīr vo chīñ-bar-jabīñ ma.alūm hotī hai

tirī shīrīñ-kalāmī kā vo dil ko shauq hai saaqī

sharāb-e-talḳh bhī ab añgbīñ ma.alūm hotī hai

nigāh-e-ārzū par bhī asar hai yaas kā itnā

ki sar-tā-pā nigāh-e-vāpsīñ ma.alūm hotī hai

jahāñ baal aa gayā us meñ kahāñ phir ḳhair shīshe kī

tumhārī zulf dil meñ jāguzīñ ma.alūm hotī hai

kiyā hai is qadar gum mujh ko zauq-e-jab.ha-sā.ī ne

shabīh-e-pā mujhe naqsh-e-jabīñ ma.alūm hotī hai

guzar kar mai-kade se chashma-e-kausar pe jā pahuñchī

nazar shaiḳh-e-haram kī daur meñ ma.alūm hotī hai

'tabīb' apnī ġhazal hai yā koī phūlā-phalā gulshan

baḌī sairāb sheroñ kī zamīñ ma.alūm hotī hai

ziya-e-husn-e-jaanan jaguzin malum hoti hai

bayaz-e-chashm-e-dil arsh-e-barin malum hoti hai

teri surat bhi kaisi dil-nashin malum hoti hai

ki jis dil mein use DhunDo wahin malum hoti hai

asar is darja kar rakkha hai KHauf-e-hijr ne dil par

ki un ki han bhi ab mujh ko nahin malum hoti hai

idhar aankhen milin un se musaKHKHar tha idhar aashiq

nigah-e-dil-ruba sehr-afrin malum hoti hai

bahaar aai hai ya fasl-e-junun aai hai gulshan mein

ek ek gul ki qaba be-astin malum hoti hai

na nikli hai na ab niklegi mere KHana-e-dil se

ek ek hasrat meri KHalwat-nashin malum hoti hai

kuchh aisa ho gaya chashm-e-kahil-e-yar ka sauda

ki nargis bhi mujhe ab surmagin malum hoti hai

ghulaya mujh ko rafta-rafta yar-e-zulf-e-barham ne

mohabbat us ki mar-e-astin malum hoti hai

kaTe hum KHauf se bal un ki peshani pe kya aaya

koi shamshir wo chin-bar-jabin malum hoti hai

teri shirin-kalami ka wo dil ko shauq hai saqi

sharab-e-talKH bhi ab angbin malum hoti hai

nigah-e-arzu par bhi asar hai yas ka itna

ki sar-ta-pa nigah-e-wapsin malum hoti hai

jahan baal aa gaya us mein kahan phir KHair shishe ki

tumhaari zulf dil mein jaguzin malum hoti hai

kiya hai is qadar gum mujh ko zauq-e-jabha-sai ne

shabih-e-pa mujhe naqsh-e-jabin malum hoti hai

guzar kar mai-kade se chashma-e-kausar pe ja pahunchi

nazar shaiKH-e-haram ki daur mein malum hoti hai

'tabib' apni ghazal hai ya koi phula-phala gulshan

baDi sairab sheron ki zamin malum hoti hai