zor yun dard ka kam hone laga aaKHir-e-shab

zor yuuñ dard kā kam hone lagā āḳhir-e-shab

jis tarah TūTne lagtā hai nasha āḳhir-e-shab

be-sabab hī to mirī aañkh nahīñ khul saktī

kis ne bhūle se mujhe yaad kiyā āḳhir-e-shab

shāyad aa pahuñche haiñ nazdīk safīrān-e-sahar

koī detā hai dar-dil pe sadā āḳhir-e-shab

jāñ-nisārī meñ patangoñ ne kamī kyā kī thī

sham.a ne kis liye dam toḌ diyā āḳhir-e-shab

aap ke paañv kī aahaT kā gumāñ hotā hai

ghar ke āñgan meñ jab aatī hai sabā āḳhir-e-shab

kis ke ashkoñ kā ḳhudā jaane asar hai 'rāhī'

bhīgī bhīgī sī jo rahtī hai fazā āḳhir-e-shab

zor yun dard ka kam hone laga aaKHir-e-shab

jis tarah TuTne lagta hai nasha aaKHir-e-shab

be-sabab hi to meri aankh nahin khul sakti

kis ne bhule se mujhe yaad kiya aaKHir-e-shab

shayad aa pahunche hain nazdik safiran-e-sahar

koi deta hai dar-dil pe sada aaKHir-e-shab

jaan-nisari mein patangon ne kami kya ki thi

shama ne kis liye dam toD diya aaKHir-e-shab

aap ke panw ki aahaT ka guman hota hai

ghar ke aangan mein jab aati hai saba aaKHir-e-shab

kis ke ashkon ka KHuda jaane asar hai 'rahi'

bhigi bhigi si jo rahti hai faza aaKHir-e-shab