zuhur-e-zat ka tul-e-masafat kaun samjhega

zuhūr-e-zāt kā tūl-e-masāfat kaun samjhegā

na ham bole to phir asrār-e-hijrat kaun samjhegā

zamīñ par maar kar sāġhar ye vā'iz kahtā jaatā hai

musalsal hosh meñ rahne kī vahshat kaun samjhegā

girāo bijliyāñ yuuñ hī jalāo āshiyāñ yuuñ hī

vagarna rāz-e-mafhūm-e-qayāmat kaun samjhegā

tire pahlū meñ rahne kī suhūlat log pūchheñge

tire pahlū tak aane kī aziyyat kaun samjhegā

nahīñ haiñ jin meñ poshīda koī āsār jismoñ ke

'safar' jannat meñ un rūhoñ kī ġhurbat kaun samjhegā

zuhur-e-zat ka tul-e-masafat kaun samjhega

na hum bole to phir asrar-e-hijrat kaun samjhega

zamin par mar kar saghar ye wa'iz kahta jata hai

musalsal hosh mein rahne ki wahshat kaun samjhega

girao bijliyan yun hi jalao aashiyan yun hi

wagarna raaz-e-mafhum-e-qayamat kaun samjhega

tere pahlu mein rahne ki suhulat log puchhenge

tere pahlu tak aane ki aziyyat kaun samjhega

nahin hain jin mein poshida koi aasar jismon ke

'safar' jannat mein un ruhon ki ghurbat kaun samjhega