zuhur mera azal se hai irtiqa ban kar

zuhūr merā azal se hai irtiqā ban kar

isī tarah se maiñ qaa.em huuñ silsila ban kar

zamīñ pe kitne samandar mirī talāsh meñ the

maiñ āsmān pe uḌtā rahā ghaTā ban kar

sivā.e mere na thā koī jo mujhe suntā

tamām dasht meñ gūñjā huuñ maiñ sadā ban kar

mire vajūd ke andar hī saarī duniyā thī

maiñ dekhtā rahā duniyā ko aa.ina ban kar

na koī samt hai mere liye na manzil hai

ki ibtidā se chalā huuñ maiñ intihā ban kar

har ek chiiz jo dekhī hayāt se 'aarī

maiñ chhā gayā ruḳh-e-mahtāb par fazā ban kar

kabhī jo dasht-navardī se vaqt miltā hai

guloñ ko chūmtā phirtā huuñ maiñ sabā ban kar

nigāh milte hī sharmā ke rah gayā koī

chhupā huā thā maiñ āñkhoñ meñ mudda'ā ban kar

vo raat jis meñ dhaḌakte rahe haiñ ham donoñ

vo raat kaash phir aa jaa.e hādisa ban kar

hazār aag ke dariyāoñ se guzarnā hai

'asar' hayāt milī bhī to marhala ban kar

zuhur mera azal se hai irtiqa ban kar

isi tarah se main qaem hun silsila ban kar

zamin pe kitne samandar meri talash mein the

main aasman pe uDta raha ghaTa ban kar

siwae mere na tha koi jo mujhe sunta

tamam dasht mein gunja hun main sada ban kar

mere wajud ke andar hi sari duniya thi

main dekhta raha duniya ko aaina ban kar

na koi samt hai mere liye na manzil hai

ki ibtida se chala hun main intiha ban kar

har ek chiz jo dekhi hayat se 'ari

main chha gaya ruKH-e-mahtab par faza ban kar

kabhi jo dasht-nawardi se waqt milta hai

gulon ko chumta phirta hun main saba ban kar

nigah milte hi sharma ke rah gaya koi

chhupa hua tha main aankhon mein mudda'a ban kar

wo raat jis mein dhaDakte rahe hain hum donon

wo raat kash phir aa jae hadisa ban kar

hazar aag ke dariyaon se guzarna hai

'asar' hayat mili bhi to marhala ban kar