zulf-e-daraaz se ye numayan hai ghaaliban

zulf-e-darāz se ye numāyāñ hai ġhāliban

bhālū kī shakl kā koī insāñ hai ġhāliban

qaul o amal meñ jis ke nazar aa.e kuchh tazād

vo maulvī nahīñ koī shaitāñ hai ġhāliban

gulshan meñ to guloñ kā kahīñ naam tak nahīñ

ye bāġhbāñ ke haath meñ ghoiyāñ hai ġhāliban

hotā hai us kī shoḳhi-e-guftār par gumāñ

lahbaḌ nahīñ hai ye koī Toiyāñ hai ġhāliban

hotā nahīñ hai ab jo namak-pāshiyoñ kā daur

bas ḳhālī ḳhālī un kā namak-dāñ hai ġhāliban

bulbul ġhunūdgī meñ hai aur phuul muzmahil

afyūnchī ye saarā gulistāñ hai ġhāliban

firqa-parastiyoñ ne khilā.e kuchh aise gul

samjhe ye log fasl-e-bahārāñ hai ġhāliban

yuuñ be-tahāsha piine lage mai-kade meñ shaiḳh

Tharrā bhī ab to bāda-e-irfāñ hai ġhāliban

rah kar hamārī gardish-e-qismat ke saath saath

chakkar meñ ḳhud bhī gardish-e-daurāñ hai ġhāliban

hurmat kā us kī aap ko vaa.iz jo hai ḳhayāl

bint-e-inab huzūr hī kī maañ hai ġhāliban

har samt jo jalājal-o-qarnā kā shor hai

ġhāzī-miyāñ ke byaah kā sāmāñ hai ġhāliban

ai 'shauq' har tarah ke nazar aa rahe haiñ husn

naḳhḳhās hī meñ kūcha-e-jānāñ hai ġhāliban

zulf-e-daraaz se ye numayan hai ghaaliban

bhaalu ki shakl ka koi insan hai ghaaliban

qaul o amal mein jis ke nazar aae kuchh tazad

wo maulwi nahin koi shaitan hai ghaaliban

gulshan mein to gulon ka kahin nam tak nahin

ye baghban ke hath mein ghoiyan hai ghaaliban

hota hai us ki shoKHi-e-guftar par guman

lahbaD nahin hai ye koi Toiyan hai ghaaliban

hota nahin hai ab jo namak-pashiyon ka daur

bas KHali KHali un ka namak-dan hai ghaaliban

bulbul ghunudgi mein hai aur phul muzmahil

afyunchi ye sara gulistan hai ghaaliban

firqa-parastiyon ne khilae kuchh aise gul

samjhe ye log fasl-e-bahaaran hai ghaaliban

yun be-tahasha pine lage mai-kade mein shaiKH

Tharra bhi ab to baada-e-irfan hai ghaaliban

rah kar hamari gardish-e-qismat ke sath sath

chakkar mein KHud bhi gardish-e-dauran hai ghaaliban

hurmat ka us ki aap ko waiz jo hai KHayal

bint-e-inab huzur hi ki man hai ghaaliban

har samt jo jalajal-o-qarna ka shor hai

ghazi-miyan ke byah ka saman hai ghaaliban

ai 'shauq' har tarah ke nazar aa rahe hain husn

naKHKHas hi mein kucha-e-jaanan hai ghaaliban