zulf-e-jaanan ki taraf yun na pareshan chaliye

zulf-e-jānāñ kī taraf yuuñ na pareshāñ chaliye

un se milne kā irāda hai to ḳhandāñ chaliye

'ishq pāband nahīñ vaqt kī dīvāroñ kā

husn kā shahr salāmat hai ġhazal-ḳhvāñ chaliye

kār-nāma koī anjām to de leñ jis par

faḳhr karte hue ai gardish-e-daurāñ chaliye

inqalāb aa.e to insān kā ġham khāne ko

sar ke bal shauq se tūfān-ba-dāmāñ chaliye

vasl kī shāḳh harī ho to muqaddar samjho

hijr shāmil ho to bādīda-e-giryāñ chaliye

vo bhī kahte haiñ ki hālāt badal sakte haiñ

mil ke sahrā ko banā leñge gulistāñ chaliye

ek se ek hai nazzāra na.ī duniyā meñ

aa.iye dekhiye angusht-ba-dandāñ chaliye

mo'atabar log jharokoñ meñ khaḌe haiñ 'zaidī'

un kī nazroñ meñ hai har dard kā darmāñ chaliye

zulf-e-jaanan ki taraf yun na pareshan chaliye

un se milne ka irada hai to KHandan chaliye

'ishq paband nahin waqt ki diwaron ka

husn ka shahr salamat hai ghazal-KHwan chaliye

kar-nama koi anjam to de len jis par

faKHr karte hue ai gardish-e-dauran chaliye

inqalab aae to insan ka gham khane ko

sar ke bal shauq se tufan-ba-daman chaliye

wasl ki shaKH hari ho to muqaddar samjho

hijr shamil ho to baadida-e-giryan chaliye

wo bhi kahte hain ki haalat badal sakte hain

mil ke sahra ko bana lenge gulistan chaliye

ek se ek hai nazzara nai duniya mein

aaiye dekhiye angusht-ba-dandan chaliye

mo'atabar log jharokon mein khaDe hain 'zaidi'

un ki nazron mein hai har dard ka darman chaliye