zulf-e-shab ka saya bhi kis qadar ghanera hai

zulf-e-shab kā saaya bhī kis qadar ghanerā hai

dil se un kī mahfil tak rāsta añdherā hai

āriz-e-tabassum par ġhāza-e-takalluf kyoñ

muskurā ke dekho to har taraf saverā hai

shāḳh-e-gul sī bāheñ hoñ yā ḳhunak havā.eñ hoñ

tā.ir-e-taḳhayyul kā kab kahīñ baserā hai

un kā naam jab leñge dil zarūr dhaḌkegā

un kī yaad kā jab tak mere dil meñ Derā hai

dāman-e-mohabbat meñ āñsuoñ ke motī haiñ

yā chaman meñ shabnam ne la.al-o-zar bikherā hai

tum matā-e-ġham 'sābir' jaise ho bachā lenā

rahzanoñ kī bastī hai dākuoñ kā Derā hai

zulf-e-shab ka saya bhi kis qadar ghanera hai

dil se un ki mahfil tak rasta andhera hai

aariz-e-tabassum par ghaza-e-takalluf kyon

muskura ke dekho to har taraf sawera hai

shaKH-e-gul si bahen hon ya KHunak hawaen hon

tair-e-taKHayyul ka kab kahin basera hai

un ka nam jab lenge dil zarur dhaDkega

un ki yaad ka jab tak mere dil mein Dera hai

daman-e-mohabbat mein aansuon ke moti hain

ya chaman mein shabnam ne lal-o-zar bikhera hai

tum mata-e-gham 'sabir' jaise ho bacha lena

rahzanon ki basti hai dakuon ka Dera hai