zulf ke Dore na Dalo yar mujh par

zulf ke Dore na Daalo yaar mujh par

aaj itnā to karo upkār mujh par

kyā huā mujh ko mujhe kuchh to batāo

hañs rahe haiñ 'ishq ke bīmār mujh par

kab talak phereñge mujh se aap nazreñ

ik nazar to Dāliye sarkār mujh par

roz to jhagḌā kiyā karte ho mujh se

aaj kyoñ barsā rahe ho pyaar mujh par

us pe maiñ ne bhī likhīñ do-chār ġhazleñ

us ne bhī nazmeñ likhīñ do-chār mujh par

jab se maiñ terī kahānī kā huuñ hissa

ab nahīñ jañchtā koī kirdār mujh par

jāntā thā ghūm-phir ke aa.egā hī

'ishq kā ilzām āḳhir-kār mujh par

kyā pata mujh ko ki āḳhir kyoñ biThā.e

us ke ghar vāloñ ne pahre-dār mujh par

'ishq to āsān hai maiñ kar bhī letā

hai Tikā lekin mirā ghar-bār mujh par

zulf ke Dore na Dalo yar mujh par

aaj itna to karo upkar mujh par

kya hua mujh ko mujhe kuchh to batao

hans rahe hain 'ishq ke bimar mujh par

kab talak pherenge mujh se aap nazren

ek nazar to Daliye sarkar mujh par

roz to jhagDa kiya karte ho mujh se

aaj kyon barsa rahe ho pyar mujh par

us pe main ne bhi likhin do-chaar ghazlen

us ne bhi nazmen likhin do-chaar mujh par

jab se main teri kahani ka hun hissa

ab nahin janchta koi kirdar mujh par

jaanta tha ghum-phir ke aaega hi

'ishq ka ilzam aaKHir-kar mujh par

kya pata mujh ko ki aaKHir kyon biThae

us ke ghar walon ne pahre-dar mujh par

'ishq to aasan hai main kar bhi leta

hai Tika lekin mera ghar-bar mujh par