zulm Dhaya jo sitamgar teri ranai ne

zulm Dhāyā jo sitamgar tirī ra.anā.ī ne

kah diyā sab se mirī chashm-e-tamāshā.ī ne

mujh ko dīvāna kiyā un kī ḳhud-ārā.ī ne

un ko maġhrūr kiyā merī jabīñ-sā.ī ne

maiñ kahāñ aur tirī anjuman-e-nāz kahāñ

zulm Dhaa.e tire darbāñ kī shanāsā.ī ne

sham.a ḳhāmosh hai chup huuñ maiñ kahe phir ye kaun

dil jalā.e haiñ tirī anjuman-ārā.ī ne

le ga.ī luuT ke sab sabr-o-ḳhirad hosh-o-havās

pā ke tanhā mujhe luuTā shab-e-tanhā.ī ne

vasl meñ kartī hai bebāk javānī kī umang

kah diyā aap kī mastī bharī añgḌā.ī ne

dekh kar aa.ina sharmā ke jhukā liiñ āñkheñ

kyā ḳhajil un ko kiyā da.avā-e-yaktā.ī ne

baaġh meñ bol ga.e bolne vaale bulbul

chup hazāroñ ko kiyā hai mirī goyā.ī ne

ek pyāle meñ banā ārif-e-kāmil 'safdar'

kar diyā mast mujhe sāġhar-e-mīnā.ī ne

zulm Dhaya jo sitamgar teri ranai ne

kah diya sab se meri chashm-e-tamashai ne

mujh ko diwana kiya un ki KHud-arai ne

un ko maghrur kiya meri jabin-sai ne

main kahan aur teri anjuman-e-naz kahan

zulm Dhae tere darban ki shanasai ne

shama KHamosh hai chup hun main kahe phir ye kaun

dil jalae hain teri anjuman-arai ne

le gai luT ke sab sabr-o-KHirad hosh-o-hawas

pa ke tanha mujhe luTa shab-e-tanhai ne

wasl mein karti hai bebak jawani ki umang

kah diya aap ki masti bhari angDai ne

dekh kar aaina sharma ke jhuka lin aankhen

kya KHajil un ko kiya dawa-e-yaktai ne

bagh mein bol gae bolne wale bulbul

chup hazaron ko kiya hai meri goyai ne

ek pyale mein bana aarif-e-kaamil 'safdar'

kar diya mast mujhe saghar-e-minai ne